ਨਿਊ ਹੈਂਪਸ਼ਾਇਰ/ਨਿਊਯਾਰਕ (ਅਰਜਨ ਰਿਆੜ/ਧੀਰਜ ਛੋਕਰਾਂ)-  ਅਮਰੀਕਾ ਦੀ ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਇਨਫੋਰਸਮੈਂਟ ICE ਨੇ ਭਾਰਤੀ ਮੂਲ ਦੇ ਟਰੱਕ ਡਰਾਈਵਰ ਸਤਵੀਰ ਸਿੰਘ ਨੂੰ ਨਿਊ ਹੈਂਪਸ਼ਾਇਰ ਦੇ ਹਿਲਸਬਰੋ ਵਿੱਚ ਇੱਕ ਕਮਰਸ਼ੀਅਲ ਵਾਹਨ ਜਾਂਚ ਕੇਂਦਰ ਤੋਂ ਗ੍ਰਿਫ਼ਤਾਰ ਕੀਤਾ ਹੈ। ICE ਦੇ ਅਨੁਸਾਰ, ਸਤਵੀਰ ਸਿੰਘ ਅਮਰੀਕਾ ਵਿੱਚ ਆਪਣੀ ਮਨਜ਼ੂਰਸ਼ੁਦਾ ਰਹਾਇਸ਼ ਦੀ ਮਿਆਦ ਖਤਮ ਹੋਣ ਤੋਂ ਬਾਅਦ ਅੱਠ ਸਾਲ ਤੋਂ ਵੱਧ ਸਮੇਂ ਤੱਕ ਉੱਥੇ ਰਹਿੰਦਾ ਰਿਹਾ। ICE Boston  ਮੁਤਾਬਕ ਸਤਵੀਰ ਸਿੰਘ 2017 ਵਿੱਚ ਕਾਨੂੰਨੀ ਤੌਰ ’ਤੇ ਅਮਰੀਕਾ ਦਾਖਲ ਹੋਇਆ ਸੀ, ਪਰ ਬਾਅਦ ਵਿੱਚ ਉਸ ਦੀ ਮਨਜ਼ੂਰਸ਼ੁਦਾ ਰਹਾਇਸ਼ ਦੀ ਮਿਆਦ ਖ਼ਤਮ ਹੋਣ ਦੇ ਬਾਵਜੂਦ ਉਹ ਅਮਰੀਕਾ ਵਿੱਚ ਰਿਹਾ। 11 ਸਤੰਬਰ 2026 ਨੂੰ ਹਿਲਸਬਰੋ ਵਿੱਚ ਟਾਰਗੇਟਡ ਇਨਫ਼ੋਰਸਮੈਂਟ ਕਾਰਵਾਈ ਦੌਰਾਨ ਉਸ ਨੂੰ ਹਿਰਾਸਤ ਵਿੱਚ ਲਿਆ ਗਿਆ।ਉਸ ਸਮੇਂ ਸਤਵੀਰ ਸਿੰਘ ਇੰਟਰਸਟੇਟ ਕਮਰਸ਼ੀਅਲ ਟਰੱਕ ਡਰਾਈਵਰ ਵਜੋਂ ਕੰਮ ਕਰ ਰਿਹਾ ਸੀ। ਰਿਪੋਰਟਾਂ ਮੁਤਾਬਕ ਉਸ ਦੀ ਰਿਹਾਇਸ਼ ਨਿਊ ਜਰਸੀ ਵਿੱਚ ਸੀ ਅਤੇ ਉਸ ਦਾ ਕੰਮ ਵੱਖ-ਵੱਖ ਸੂਬਿਆਂ ਵਿਚਕਾਰ ਟਰੱਕ ਚਲਾਉਣ ਨਾਲ ਸਬੰਧਤ ਸੀ।
ਇਸ ਮਾਮਲੇ ਦੀ ਖਾਸ ਗੱਲ ਇਹ ਹੈ ਕਿ ਸਤਬੀਰ ਸਿੰਘ ਕੋਈ ਅਜਿਹਾ ਵਿਅਕਤੀ ਨਹੀਂ ਸੀ ਜੋ ਹਾਲ ਹੀ ਵਿੱਚ ਸਰਹੱਦ ਪਾਰ ਕਰਕੇ ਅਮਰੀਕਾ ਵਿੱਚ ਦਾਖਲ ਹੋਇਆ ਹੋਵੇ। ICE ਦੇ ਅਨੁਸਾਰ ਉਹ 2017 ਵਿੱਚ ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਆਇਆ ਸੀ ਅਤੇ ਇਸ ਤੋਂ ਬਾਅਦ ਲੰਬੇ ਸਮੇਂ ਤੱਕ ਆਪਣੀ ਇਮੀਗ੍ਰੇਸ਼ਨ ਮਿਆਦ ਤੋਂ ਵੱਧ ਰਹਿੰਦਾ ਰਿਹਾ। ਉਪਲਬਧ ਜਾਣਕਾਰੀ ਅਨੁਸਾਰ 935 ਨੇ ਸਤਵੀਰ ਸਿੰਘ ’ਤੇ ਇਸ ਮਾਮਲੇ ਵਿੱਚ ਟਰੱਕਿੰਗ ਸੇਫ਼ਟੀ ਉਲੰਘਣਾ, CDL ਧੋਖਾਧੜੀ ਜਾਂ ਟ੍ਰੈਫ਼ਿਕ ਅਪਰਾਧ ਦਾ ਦੋਸ਼ ਨਹੀਂ ਲਾਇਆ। ਗ੍ਰਿਫ਼ਤਾਰੀ ਦਾ ਦੱਸਿਆ ਗਿਆ ਆਧਾਰ ਇਮੀਗ੍ਰੇਸ਼ਨ ਸਟੇਟਸ ਅਤੇ ਮਨਜ਼ੂਰਸ਼ੁਦਾ ਰਹਾਇਸ਼ ਤੋਂ ਵੱਧ ਸਮੇਂ ਤੱਕ ਅਮਰੀਕਾ ਵਿੱਚ ਰਹਿਣਾ ਹੈ। ਇਹ ਗ੍ਰਿਫ਼ਤਾਰੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਅਮਰੀਕੀ ਅਧਿਕਾਰੀਆਂ ਵੱਲੋਂ ਕਮਰਸ਼ੀਅਲ ਟਰੱਕਿੰਗ ਸੈਕਟਰ ਵਿੱਚ ਇਮੀਗ੍ਰੇਸ਼ਨ ਅਤੇ ਡਰਾਈਵਿੰਗ ਦਸਤਾਵੇਜ਼ਾਂ ਦੀ ਜਾਂਚ ਵਧਾਈ ਜਾ ਰਹੀ ਹੈ। ਹਿਲਸਬਰੋ ਦੀ ਕਾਰਵਾਈ ਨੇ ਇਹ ਵੀ ਦਰਸਾਇਆ ਹੈ ਕਿ ਇਮੀਗ੍ਰੇਸ਼ਨ ਇਨਫ਼ੋਰਸਮੈਂਟ ਹੁਣ ਟਰੱਕਾਂ ਦੇ ਇੰਸਪੈਕਸ਼ਨ ਅਤੇ ਵਜ਼ਨ ਜਾਂਚ ਕੇਂਦਰਾਂ ਵਰਗੀਆਂ ਥਾਵਾਂ ’ਤੇ ਵੀ ਹੋ ਸਕਦੀ ਹੈ।
ਜ਼ਿਕਰਯੋਗ ਹੈ ਕਿ ਸਤਵੀਰ ਸਿੰਘ ਦੇ ਮਾਮਲੇ ਵਿੱਚ ਅੱਗੇ ਦੀ ਇਮੀਗ੍ਰੇਸ਼ਨ ਕਾਰਵਾਈ ਜਾਂ ਅਦਾਲਤੀ ਫ਼ੈਸਲੇ ਬਾਰੇ ਉਪਲਬਧ ਰਿਪੋਰਟਾਂ ਵਿੱਚ ਅਜੇ ਪੂਰੀ ਜਾਣਕਾਰੀ ਸਾਹਮਣੇ ਨਹੀਂ ਆਈ। ICE ਵੱਲੋਂ ਲਗਾਏ ਦੋਸ਼ ਅਤੇ ਕਿਸੇ ਅੰਤਿਮ ਇਮੀਗ੍ਰੇਸ਼ਨ ਅਦਾਲਤੀ ਫੈਸਲੇ ਨੂੰ ਵੱਖ-ਵੱਖ ਸਮਝਣਾ ਜ਼ਰੂਰੀ ਹੈ।