3 ਨਵੰਬਰ ਨੂੰ ਵੋਟਿੰਗ, ਮਹਿੰਗਾਈ, ਇਮੀਗ੍ਰੇਸ਼ਨ, ਅਰਥਵਿਵਸਥਾ ਅਤੇ ਇਰਾਨ ਨਾਲ ਟਕਰਾਅ ਬਣੇ ਅਹਿਮ ਮੁੱਦੇ
ਅਮਰੀਕਾ ਵਿੱਚ 3 ਨਵੰਬਰ ਨੂੰ ਹੋਣ ਵਾਲੀਆਂ ਮੱਧਕਾਲੀ ਚੋਣਾਂ ਰਾਸਟਰਪਤੀ ਡੋਨਾਲਡ ਟਰੰਪ ਦੇ ਦੂਜੇ ਕਾਰਜਕਾਲ ਲਈ ਇੱਕ ਮਹੱਤਵਪੂਰਨ ਸਿਆਸੀ ਇਮਤਿਹਾਨ ਬਣ ਗਈਆਂ ਹਨ| ਇਨ੍ਹਾਂ ਚੋਣਾਂ ਵਿੱਚ ਅਮਰੀਕੀ ਪ੍ਰਤੀਨਿਧੀ ਸਭਾ ਦੀਆਂ ਸਾਰੀਆਂ 435 ਸੀਟਾਂ ਅਤੇ ਸੈਨੇਟ ਦੀਆਂ 35 ਸੀਟਾਂ ਉੱਤੇ ਮੁਕਾਬਲੇ ਹੋਣਗੇ| ਇਸ ਤੋਂ ਇਲਾਵਾ ਕਈ ਰਾਜਾਂ ਵਿੱਚ ਗਵਰਨਰ ਅਤੇ ਹੋਰ ਅਹਿਮ ਅਹੁਦਿਆਂ ਲਈ ਵੀ ਵੋਟਾਂ ਪੈਣਗੀਆਂ| ਇਨ੍ਹਾਂ ਚੋਣਾਂ ਦਾ ਮਹੱਤਵ ਸਿਰਫ਼ ਇਹ ਨਹੀਂ ਕਿ ਕਿਹੜੀ ਪਾਰਟੀ ਕਿੰਨੀਆਂ ਸੀਟਾਂ ਜਿੱਤਦੀ ਹੈ, ਸਗੋਂ ਇਹ ਵੀ ਹੈ ਕਿ ਅਗਲੇ ਦੋ ਸਾਲਾਂ ਦੌਰਾਨ ਰਾਸ਼ਟਰਪਤੀ ਟਰੰਪ ਨੂੰ ਕਾਂਗਰਸ ਦਾ ਕਿੰਨਾ ਸਹਿਯੋਗ ਮਿਲੇਗਾ? ਜੇ ਰਿਪਬਲਿਕਨ ਪਾਰਟੀ ਆਪਣਾ ਬਹੁਮਤ ਬਰਕਰਾਰ ਰੱਖਦੀ ਹੈ ਤਾਂ ਵ੍ਹਾਈਟ ਹਾਊਸ ਲਈ ਆਪਣਾ ਵਿਧਾਨਕ ਏਜੰਡਾ ਅੱਗੇ ਵਧਾਉਣਾ ਸੌਖਾ ਹੋ ਸਕਦਾ ਹੈ| ਦੂਜੇ ਪਾਸੇ ਜੇ ਡੈਮੋਕ੍ਰੇਟਿਕ ਪਾਰਟੀ ਕਿਸੇ ਇੱਕ ਜਾਂ ਦੋਵਾਂ ਸਦਨਾਂ ਵਿੱਚ ਬਹੁਮਤ ਹਾਸਲ ਕਰਦੀ ਹੈ ਤਾਂ ਰਾਸ਼ਟਰਪਤੀ ਦੀਆਂ ਨੀਤੀਆਂ ਉੱਤੇ ਕਾਂਗਰਸ ਦੀ ਨਿਗਰਾਨੀ ਅਤੇ ਸਿਆਸੀ ਟਕਰਾਅ ਵਧ ਸਕਦਾ ਹੈ| 
2 ਨਵੰਬਰ ਨੂੰ ਜਾਰੀ ਹੋਏ Reuters/9psos ਦੇ ਸਰਵੇਖਣ ਵਿੱਚ ਡੈਮੋਕ੍ਰੇਟਿਕ ਉਮੀਦਵਾਰਾਂ ਨੂੰ 46 ਫੀਸਦੀ ਅਤੇ ਰਿਪਬਲਿਕਨ ਉਮੀਦਵਾਰਾਂ ਨੂੰ 38 ਫੀਸਦੀ ਰਜਿਸਟਰਡ ਵੋਟਰਾਂ ਦੀ ਹਮਾਇਤ ਮਿਲੀ| ਰਾਸ਼ਟਰਪਤੀ ਟਰੰਪ ਦੇ ਕੰਮਕਾਜ ਨਾਲ ਸੰਤੁਸ਼ਟੀ ਸਿਰਫ਼ 32 ਫੀਸਦੀ ਦਰਜ ਕੀਤੀ ਗਈ| ਇਹ ਸਰਵੇਖਣ 1,765 ਅਮਰੀਕੀ ਬਾਲਗਾਂ ਉੱਤੇ ਆਧਾਰਿਤ ਸੀ| ਇਹ ਰਾਸ਼ਟਰੀ ਪੱਧਰ ਦਾ ਪਾਰਟੀ-ਪਸੰਦ ਸਰਵੇਖਣ ਹੈ, ਚੋਣ ਨਤੀਜਾ ਜਾਂ ਸੀਟਾਂ ਦੀ ਪੇਸ਼ੀਨਗੋਈ ਨਹੀਂ ਮੰਨੀ ਜਾ ਸਕਦੀ| ਸਰਵੇਖਣ ਵਿੱਚ 78 ਫੀਸਦੀ ਲੋਕਾਂ ਨੇ ਰਹਿਣ-ਸਹਿਣ ਦੇ ਖਰਚੇ ਨੂੰ ਬਹੁਤ ਮਹੱਤਵਪੂਰਨ ਜਾਂ ਆਪਣਾ ਸਭ ਤੋਂ ਵੱਡਾ ਚੋਣ ਮੁੱਦਾ ਦੱਸਿਆ ਗਿਆ ਹੈ| ਇਸ ਮਸਲੇ ਉੱਤੇ 43 ਫੀਸਦੀ ਲੋਕਾਂ ਨੇ ਡੈਮੋਕ੍ਰੇਟਿਕ ਪਾਰਟੀ ਅਤੇ 32 ਫੀਸਦੀ ਨੇ ਰਿਪਬਲਿਕਨ ਪਾਰਟੀ ਉੱਤੇ ਵਧੇਰੇ ਭਰੋਸਾ ਜਤਾਇਆ| ਸਿਹਤ ਸੇਵਾਵਾਂ, ਇਮੀਗ੍ਰੇਸ਼ਨ ਅਤੇ ਇਰਾਨ ਨਾਲ ਜੰਗ ਵੀ ਵੋਟਰਾਂ ਦੀਆਂ ਚਿੰਤਾਵਾਂ ਵਿੱਚ ਸ਼ਾਮਲ ਹਨ|  
ਵੋਟ ਪਾਉਣ ਦੇ ਉਤਸ਼ਾਹ ਵਿੱਚ ਵੀ ਫ਼ਰਕ ਸਾਹਮਣੇ ਆਇਆ| ਡੈਮੋਕ੍ਰੇਟਿਕ ਸਮੱਰਥਕਾਂ ਵਿੱਚੋਂ 49 ਫੀਸਦੀ ਅਤੇ ਰਿਪਬਲਿਕਨ ਸਮੱਰਥਕਾਂ ਵਿੱਚੋਂ 33 ਫੀਸਦੀ ਨੇ ਵੋਟ ਪਾਉਣ ਲਈ ਬਹੁਤ ਉਤਸ਼ਾਹਿਤ ਹੋਣ ਦੀ ਗੱਲ ਕਹੀ| ਹਾਲਾਂਕਿ ਉਤਸ਼ਾਹ ਦਾ ਇਹ ਅੰਤਰ ਅਸਲ ਵੋਟਿੰਗ ਵਿੱਚ ਕਿੰਨਾ ਬਦਲੇਗਾ, ਇਹ ਨਤੀਜਿਆਂ ਤੋਂ ਹੀ ਪਤਾ ਲੱਗੇਗਾ| ਗੈਰ-ਪੱਖਪਾਤੀ ਚੋਣ ਵਿਸ਼ਲੇਸ਼ਣ ਸੰਸਥਾ ਨੇ ਪ੍ਰਤੀਨਿਧੀ ਸਭਾ ਦੀਆਂ 222 ਸੀਟਾਂ ਡੈਮੋਕ੍ਰੇਟਿਕ ਪਾਰਟੀ ਵੱਲ ਝੁਕਦੀਆਂ, 195 ਰਿਪਬਲਿਕਨ ਪਾਰਟੀ ਵੱਲ ਝੁਕਦੀਆਂ ਅਤੇ 18 ਸੀਟਾਂ ਨੂੰ ਬਹੁਤ ਕਰੀਬੀ ਮੁਕਾਬਲੇ ਵਾਲੀਆਂ ਦਰਸਾਇਆ ਹੈ| ਇਹ ਅੰਕੜੇ ਚੋਣਾਵੀ ਹਾਲਾਤ ਦਾ ਮੁੱਲਾਂਕਣ ਹਨ, ਪੱਕੇ ਨਤੀਜੇ ਨਹੀਂ| ਸੈਨੇਟ ਵਿੱਚ ਸਥਿਤੀ ਵੱਖਰੀ ਹੈ| Reuters ਦੇ ਵਿਸ਼ਲੇਸ਼ਣ ਅਨੁਸਾਰ ਦੋਵਾਂ ਪਾਰਟੀਆਂ ਵਿਚਾਲੇ ਮੁਕਾਬਲਾ ਸਖ਼ਤ ਬਣਿਆ ਹੋਇਆ ਹੈ| ਇਸ ਲਈ ਪ੍ਰਤੀਨਿਧੀ ਸਭਾ ਦੇ ਰਾਸ਼ਟਰੀ ਸਰਵੇਖਣਾਂ ਦੀ ਬੜ੍ਹਤ ਨੂੰ ਸੈਨੇਟ ਦੀਆਂ ਸਾਰੀਆਂ ਸੀਟਾਂ ਉੱਤੇ ਇੱਕੋ ਤਰ੍ਹਾਂ ਲਾਗੂ ਨਹੀਂ ਕੀਤਾ ਜਾ ਸਕਦਾ|  
ਚੋਣਾਂ ਦਾ ਅਮਰੀਕੀ ਸਿਆਸਤ ਉੱਤੇ ਕੀ ਅਸਰ ਪਵੇਗਾ?
ਜੇ ਡੈਮੋਕ੍ਰੇਟਿਕ ਪਾਰਟੀ ਪ੍ਰਤੀਨਿਧੀ ਸਭਾ ਵਿੱਚ ਬਹੁਮਤ ਹਾਸਲ ਕਰਦੀ ਹੈ ਤਾਂ ਉਹ ਸਰਕਾਰੀ ਖਰਚਿਆਂ, ਇਮੀਗ੍ਰੇਸ਼ਨ ਨੀਤੀਆਂ, ਇਰਾਨ ਨਾਲ ਜੰਗ ਅਤੇ ਟਰੰਪ ਪ੍ਰਸਾਸ਼ਨ ਦੇ ਫ਼ੈਸਲਿਆਂ ਦੀ ਜਾਂਚ ਲਈ ਕਮੇਟੀਆਂ ਅਤੇ ਸੁਣਵਾਈਆਂ ਦੀ ਵਰਤੋਂ ਕਰ ਸਕੇਗੀ| ਪਰ ਰਾਸ਼ਟਰਪਤੀ ਕੋਲ ਵੀਟੋ ਅਤੇ ਕਈ ਕਾਰਜਕਾਰੀ ਅਧਿਕਾਰ ਬਰਕਰਾਰ ਰਹਿਣਗੇ| ਜੇ ਰਿਪਬਲਿਕਨ ਪਾਰਟੀ ਦੋਵਾਂ ਸਦਨਾਂ ਦਾ ਕੰਟਰੋਲ ਬਰਕਰਾਰ ਰੱਖਦੀ ਹੈ ਤਾਂ ਟਰੰਪ ਪ੍ਰਸ਼ਾਸਨ ਨੂੰ ਆਪਣੇ ਵਿਧਾਨਕ ਪ੍ਰੋਗਰਾਮ ਲਈ ਕਾਂਗਰਸ ਵਿੱਚ ਵਧੇਰੇ ਸਹਿਯੋਗ ਮਿਲ ਸਕੇਗਾ| ਕਿਸੇ ਵੀ ਸਥਿਤੀ ਵਿੱਚ 2027 ਦੌਰਾਨ ਸਰਕਾਰੀ ਬਜਟ, ਕਰਜ਼ੇ ਦੀ ਹੱਦ ਅਤੇ ਸਰਕਾਰੀ ਕੰਮਕਾਜ ਬੰਦ ਹੋਣ ਦੇ ਖ਼ਤਰੇ ਵਰਗੇ ਮੁੱਦੇ ਮਹੱਤਵਪੂਰਨ ਰਹਿਣਗੇ| ਇਨ੍ਹਾਂ ਚੋਣਾਂ ਦੇ ਨਤੀਜੇ 2028 ਦੀਆਂ ਰਾਸ਼ਟਰਪਤੀ ਚੋਣਾਂ ਤੋਂ ਪਹਿਲਾਂ ਦੋਵਾਂ ਪਾਰਟੀਆਂ ਦੀਆਂ ਨੀਤੀਆਂ ਅਤੇ ਸਿਆਸੀ ਰਣਨੀਤੀਆਂ ਉੱਤੇ ਵੀ ਅਸਰ ਪਾ ਸਕਦੇ ਹਨ|
3 ਨਵੰਬਰ 2026 ਦੀ ਵੋਟਿੰਗ ਤੋਂ ਪਹਿਲਾਂ ਆਏ ਸਰਵੇਖਣਾਂ ਵਿੱਚ ਡੈਮੋਕ੍ਰੇਟਿਕ ਪਾਰਟੀ ਲਈ ਰਾਸ਼ਟਰੀ ਪੱਧਰ ’ਤੇ ਸਕਾਰਾਤਮਕ ਰੁਝਾਨ ਦਰਜ ਹੋਇਆ ਹੈ| ਪਰ ਅਸਲ ਫ਼ੈਸਲਾ ਵੋਟਰਾਂ ਦੇ ਹੱਥ ਵਿੱਚ ਹੈ| ਇਹ ਚੋਣਾਂ ਤੈਅ ਕਰਨਗੀਆਂ ਕਿ ਅਗਲੇ ਦੋ ਸਾਲਾਂ ਦੌਰਾਨ ਵ੍ਹਾਈਟ ਹਾਊਸ ਅਤੇ ਅਮਰੀਕੀ ਕਾਂਗਰਸ ਵਿਚਾਲੇ ਸਿਆਸੀ ਤਾਕਤ ਦਾ ਸੰਤੁਲਨ ਕਿਹੋ ਜਿਹਾ ਰਹੇਗਾ|    
ਧੀਰਜ ਛੋਕਰਾਂ