ਨਿਕਸ ਚੈਂਪੀਅਨਸ਼ਿਪ ਜਿੱਤਣ ਤੋਂ ਇਕ ਜਿੱਤ ਦੂਰ, 1973 ਤੋਂ ਬਾਅਦ ਪਹਿਲੀ ਵਾਰ ਜਾਗੀ ਚੈਂਪੀਅਨ ਬਣਨ ਦੀ ਆਸ 
ਨਿਊਯਾਰਕ, 11 ਜੂਨ (ਅਰਜਨ ਰਿਆੜ, ਧੀਰਜ ਛੋਕਰ ਨਿਊਯਾਰਕ)- ਅਮਰੀਕਨਾਂ ਸਮੇਤ ਅਮਰੀਕਾ ਵਸਦੇ ਲਗਭਗ ਸਾਰੇ ਹੀ ਭਾਈਚਾਰਿਆਂ ਦੀ ਪਸੰਸੀਦਾ ਖੇਡ ਬਾਸਕਟਬਾਲ ਦੇ ਐੱਨ.ਬੀ.ਏ ਦੇ ਫਾਈਨਲਜ਼ ਮੁਕਾਬਲਿਆਂ ’ਚ ਖੇਡ ਦਾ ਜਨੂੰਨ ਆਪਣੀ ਚਰਮ ਸੀਮਾ ਉੱਤੇ ਪੁੱਜ ਚੁੱਕਾ ਹੈ। ਅੱਜ ਨਿਕਸ ਨਿਊਯਾਰਕ ਅਤੇ ਸਪਰਸ ਟੀਮਾ ’ਚ ਹੋਏ ਮੁਕਾਬਲੇ ’ਚ ਦਰਸ਼ਕਾਂ ਨੂੰ ਹੈਰਾਨੀਜਨਕ ਦੌਰ ਦੇਖਣ ਨੂੰ ਮਿਲਿਆ। ਸੈਨ ਐਂਟੋਨੀਓ ਸਪਰਸ ਨੇ ਖੇਡ ਦੀ ਸ਼ੁਰੂਆਤ ਵਿੱਚ ਇੱਕ ਵੱਡੀ ਲੀਡ ਹਾਸਲ ਕਰ ਲਈ ਅਤੇ ਐੱਨ.ਬੀ.ਏ. ਫਾਈਨਲਜ਼ ਦੀ ਗੇਮ 4 ਵਿੱਚ ਲਗਾਤਾਰ ਦੂਜੀ ਗੇਮ ਦੇ ਚੱਲਦਿਆਂ 29 ਅੰਕਾਂ ਦੀ ਲੀਡ ਹਾਸਲ ਕਰ ਕੇ ਮੈਡੀਸਨ ਸਕੁਏਅਰ ਗਾਰਡਨ ਦੇ ਦਰਸ਼ਕਾਂ ਦੇ ਸ਼ੋਰ ਨੂੰ ਚੁੱਪ ਕਰਵਾ ਦਿੱਤਾ। ਪਰ ਦੂਜੇ ਹਾਫ਼ ਵਿੱਚ 29 ਅੰਕਾਂ ਦਾ ਫ਼ਾਇਦਾ ਉਦੋਂ ਬੌਨਾ ਪ੍ਰਤੀਤ ਹੋਣ ਲੱਗਾ ਜਦੋਂ ਨਿਕਸ ਨਿਊਯਾਰਕ ਦੇ ਖਿਡਾਰੀਆਂ ਨੇ ‘ਕਰੋ ਜਾਂ ਮਰੋ’ ਵਾਲੀ ਨੀਤੀ ਅਪਣਾ ਲਈ। ਨਿਊਯਾਰਕ ਨਿਕਸ ਦੇ ਖਿਡਾਰੀਆਂ ਨੇ ਹੈਰਾਨੀਜਨਕ ਅਤੇ ਜੋਸ਼ੀਲ ਪ੍ਰਦਰਸ਼ਨ ਕਰਦਿਆਂ 107-106 ਅੰਕਾਂ ਦੀ ਜਾਦੂਮਈ ਜਿੱਤ ਹਾਸਲ ਕਰ ਲਈ ਅਤੇ ‘ਪਲੇ-ਬਾਈ-ਪਲੇ’ ਦੌਰ ਵਿੱਚ ਐੱਨ.ਬੀ.ਏ. ਫਾਈਨਲਜ਼ ਦੇ ਮੁਕਾਬਲਿਆਂ ’ਚ ਸਭ ਤੋਂ ਵੱਡੀ ਵਾਪਸੀ ਕੀਤੀ। 
ਇੱਥੇ ਜ਼ਿਕਰਯੋਗ ਹੈ ਕਿ ਸੈਨ ਐਂਟੋਨੀਓ ਸਪਰਸ ਦੇ ਖਿਲਾਫ਼ ਗੇਮ 4 ਦੀ ਰੋਮਾਂਚਕ ਜਿੱਤ ਵਿੱਚ ਸੁਪਰ ਸਟਾਰ ਖਿਡਾਰੀ ਓਜੀ ਅਨੂਨੋਬੀ ਦੀ ਜੋਸ਼ੀਲੀ ਤੇ ਫੁਰਤੀਲੀ ਖੇਡ ਨੇ ਖੇਡ ਦਾ ਪਾਸਾ ਹੀ ਪਲਟ ਦਿੱਤਾ। ਉਹ ਨਿਊਯਾਰਕ ਨਿਕਸ ਲਈ ਅੱਜ ਦਾ ਨਿਰਵਿਵਾਦ ਹੀਰੋ ਸੀ। ਉਸਨੇ 33 ਅੰਕਾਂ ਨਾਲ ਇਤਿਹਾਸਕ ਵਾਪਸੀ ਦੀ ਅਗਵਾਈ ਕੀਤੀ, ਤਿੰਨ-ਪੁਆਇੰਟ ਰੇਂਜ ਤੋਂ 9 ਵਿੱਚੋਂ 7 ਦਾ ਸ਼ਾਨਦਾਰ ਸਕੋਰ, ਅਤੇ ਘੜੀ ’ਤੇ ਸਿਰਫ਼ 1:2 ਸਕਿੰਟ ਦਾ ਸਮਾਂ ਬਾਕੀ ਰਹਿੰਦਿਆਂ ਗੇਮ-ਜੇਤੂ ਟਿਪ-ਇਨ ਬਾਸਕੇਟ ਉਸਦੀਆਂ ਅੱਜ ਦੀਆਂ ਖੇਡ ਪ੍ਰਾਪਤੀਆਂ ਗਿਣੀਆਂ ਜਾ ਸਕਦੀਆਂ ਹਨ। 
ਸੈਨ ਐਂਟੋਨੀਓ ਸਪਰਸ ਦੀ ਟੀਮ ਨੇ ਤੀਜੇ ਕੁਆਰਟਰ ਵਿੱਚ 81-52 ਦੀ ਲੀਡ ਬਣਾਈ ਅਤੇ ਚੌਥੇ ਕੁਆਰਟਰ ਵਿੱਚ 9:33 ਦਾ ਸਮਾਂ ਬਾਕੀ ਰਹਿੰਦੇ ਹੋਏ 95-75 ਦੀ ਲੀਡ ਬਣਾਈ ਰੱਖੀ। ਪਰ ਇੱਕ ਸਮੇਂ ਦੀ ਤੇਜ਼-ਗਰਮੀ ਵਾਲੀ ਸਪਰਸ ਟੀਮ ਸਟ੍ਰੈਚ ਵਿੱਚ ਠੰਢੀ ਪੈ ਗਈ ਪਰ ਦੂਜੇ ਪਾਸੇ ਨਿਕਸ ਨਿਊਯਾਰਕ ਨੇ ਇਕ ਤਰਾਂ ਨਾਲ ਅੱਗ ਫ਼ੜ ਲਈ ਅਤੇ ਇੱਕ ਨਿਕਸ ਟੀਮ ਜਿਸਨੇ ਇਹਨਾਂ ਪਲੇਆਫ ਵਿੱਚ ਵੱਡੀਆਂ ਜਿੱਤਾਂ ਦਰਜ ਕੀਤੀਆਂ ਹਨ, ਨੇ ਐੱਨ.ਬੀ.ਏ. ਦੇ ਫ਼ਾਈਨਲਜ਼ ਵਿੱਚ 3-1 ਦੀ ਬੜਤ ਹਾਸਲ ਕਰਕੇ ਇਤਿਹਾਸ ਰਚ ਦਿੱਤਾ ਹੈ।
ਨਿਊਯਾਰਕ ਹੁਣ 1973 ਤੋਂ ਬਾਅਦ ਆਪਣੀ ਪਹਿਲੀ ਐੱਨ.ਬੀ.ਏ. ਚੈਂਪੀਅਨਸ਼ਿਪ ਜਿੱਤਣ ਤੋਂ ਸਿਰਫ ਇਕ ਜਿੱਤ ਦੂਰ ਹੈ। ਦੂਜੇ ਪਾਸੇ ਮੁਕਾਬਲੇ ਤੋਂ ਬਾਹਰ ਹੋਣ ਤੋਂ ਬਚਣ ਲਈ, ਸਪਰਸ ਨੂੰ ਸੈਨ ਐਂਟੋਨੀਓ ਵਿੱਚ ਘਰ ਵਾਪਸੀ ਗੇਮ ਵਿਚ ਬਾਕੀ ਬਚਦੇ ਲਗਾਤਾਰ ਤਿੰਨ ਮੁਕਾਬਲੇ ਜਿੱਤਣੇ ਪੈਣਗੇ।