Asian Hockey Championship: ਮਨਦੀਪ ਦੀ ਹੈਟ੍ਰਿਕ ਸਦਕਾ ਭਾਰਤ ਨੇ ਬੰਗਲਾਦੇਸ਼ ਨੂੰ 13-0 ਨਾਲ ਹਰਾਇਆ
ਏਸ਼ਿਆਈ ਚੈਂਪੀਅਨਜ਼ ਟਰਾਫ਼ੀ ਵਿੱਚ ਪੰਜ ਵਾਰ ਦੇ ਚੈਂਪੀਅਨ ਭਾਰਤ ਨੇ ਜਿੱਤ ਨਾਲ ਕੀਤੀ ਖ਼ਿਤਾਬੀ ਮੁਹਿੰਮ ਦੀ ਸ਼ੁਰੂਆਤ; ਕਪਤਾਨ ਹਰਮਨਪ੍ਰੀਤ, ਦਿਲਪ੍ਰੀਤ ਤੇ ਉਪ ਕਪਤਾਨ ਹਾਰਦਿਕ ਨੇ ਵੀ ਦੋ-ਦੋ ਗੋਲ ਕੀਤੇ Asian Hockey Championship: ਫਾਰਮ ਵਿੱਚ ਪਰਤੇ ਮਨਦੀਪ ਸਿੰਘ ਦੀ ਸ਼ਾਨਦਾਰ ਹੈਟ੍ਰਿਕ ਦੀ ਬਦੌਲਤ ਪੰਜ ਵਾਰ ਦੇ ਚੈਂਪੀਅਨ ਭਾਰਤ ਨੇ ਅੱਜ ਇੱਥੇ ਏਸ਼ਿਆਈ ਚੈਂਪੀਅਨਜ਼ ਟਰਾਫ਼ੀ ਹਾਕੀ ਟੂਰਨਾਮੈਂਟ ਵਿੱਚ ਆਪਣੇ ਖ਼ਿਤਾਬ ਦੀ ਰਾਖੀ ਦੀ ਮੁਹਿੰਮ ਦਾ ਧਮਾਕੇਦਾਰ ਆਗਾਜ਼ ਕਰਦਿਆਂ ਬੰਗਲਾਦੇਸ਼ ਨੂੰ 13-0 ਨਾਲ ਕਰਾਰੀ ਹਾਰ ਦਿੱਤੀ। ਮਨਦੀਪ ਨੇ ਤੀਜੇ, 10ਵੇਂ ਅਤੇ 54ਵੇਂ ਮਿੰਟ ਵਿੱਚ ਗੋਲ ਕੀਤੇ। ਕਪਤਾਨ ਹਰਮਨਪ੍ਰੀਤ ਸਿੰਘ ਨੇ ਦੂਜੇ ਅਤੇ 44ਵੇਂ ਮਿੰਟ, ਦਿਲਪ੍ਰੀਤ ਸਿੰਘ ਨੇ 43ਵੇਂ ਅਤੇ 44ਵੇਂ ਮਿੰਟ ਅਤੇ ਉਪ ਕਪਤਾਨ ਹਾਰਦਿਕ ਸਿੰਘ ਨੇ 60ਵੇਂ ਮਿੰਟ ਵਿੱਚ ਦੋ ਗੋਲ ਕੀਤੇ। ਸ਼ਿਲਾਨੰਦ ਲਾਕੜਾ ਨੇ 15ਵੇਂ, ਅਭਿਸ਼ੇਕ ਨੇ 18ਵੇਂ, ਨੀਲਕਾਂਤਾ ਸ਼ਰਮਾ ਨੇ 26ਵੇਂ ਅਤੇ ਜੁਗਰਾਜ ਸਿੰਘ ਨੇ 46ਵੇਂ ਮਿੰਟ ਵਿੱਚ ਗੋਲ ਦਾਗੇ। ਪਹਿਲੇ ਅੱਧ ਵਿੱਚ ਹੀ 6-0 ਦੀ ਲੀਡ ਓਲੰਪੀਅਨ ਸੁਰਜੀਤ ਸਿੰਘ ਹਾਕੀ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਭਾਰਤ ਨੇ ਸ਼ੁਰੂ ਤੋਂ ਹੀ ਦਬਦਬਾ ਬਣਾਈ ਰੱਖਿਆ। ਹਰਮਨਪ੍ਰੀਤ ਨੇ ਦੂਜੇ ਮਿੰਟ ਵਿੱਚ ਪੈਨਲਟੀ ਕਾਰਨਰ ਨੂੰ ਗੋਲ ਵਿੱਚ ਬਦਲ ਕੇ ਭਾਰਤ ਦਾ ਖਾਤਾ ਖੋਲ੍ਹਿਆ। ਅਗਲੇ ਹੀ ਮਿੰਟ ਮਨਦੀਪ ਨੇ ਕਪਤਾਨ ਦੇ ਸ਼ਾਨਦਾਰ ਪਾਸ ’ਤੇ ਗੋਲ ਕਰ ਦਿੱਤਾ। ਮਨਦੀਪ ਨੇ 10ਵੇਂ ਮਿੰਟ ਵਿੱਚ ਤੀਜਾ ਗੋਲ ਕੀਤਾ, ਜਦਕਿ ਸ਼ਿਲਾਨੰਦ ਨੇ ਪਹਿਲੇ ਕੁਆਰਟਰ ਦੇ ਆਖ਼ਰੀ ਪਲਾਂ ਵਿੱਚ ਭਾਰਤ ਦੀ ਲੀਡ 4-0 ਕਰ ਦਿੱਤੀ। ਅਭਿਸ਼ੇਕ ਅਤੇ ਨੀਲਕਾਂਤਾ ਨੇ ਦੂਜੇ ਕੁਆਰਟਰ ਵਿੱਚ ਗੋਲ ਕਰਕੇ ਅੱਧੇ ਸਮੇਂ ਤੱਕ ਸਕੋਰ 6-0 ਕਰ ਦਿੱਤਾ। ਭਾਰਤੀ ਖਿਡਾਰੀਆਂ ਨੇ ਗੋਲਾਂ ਦੀ ਝੜੀ ਲਾਈ ਤੀਜੇ ਕੁਆਰਟਰ ਵਿੱਚ ਦਿਲਪ੍ਰੀਤ ਨੇ ਇੱਕ ਮਿੰਟ ਦੇ ਅੰਦਰ ਦੋ ਗੋਲ ਕੀਤੇ ਅਤੇ ਹਰਮਨਪ੍ਰੀਤ ਨੇ ਵੀ ਆਪਣਾ ਦੂਜਾ ਗੋਲ ਦਾਗਿਆ। ਚੌਥੇ ਕੁਆਰਟਰ ਦੇ ਸ਼ੁਰੂ ਵਿੱਚ ਜੁਗਰਾਜ ਨੇ ਪੈਨਲਟੀ ਕਾਰਨਰ ’ਤੇ ਗੋਲ ਕੀਤਾ। ਇਸ ਤੋਂ ਬਾਅਦ ਮਨਦੀਪ ਨੇ ਹੈਟ੍ਰਿਕ ਪੂਰੀ ਕੀਤੀ। ਆਖ਼ਰੀ ਮਿੰਟ ਵਿੱਚ ਹਾਰਦਿਕ ਨੇ ਲਗਾਤਾਰ ਦੋ ਗੋਲ ਕਰਕੇ ਭਾਰਤ ਦੀ ਜਿੱਤ ਦਾ ਫ਼ਰਕ 13-0 ਕਰ ਦਿੱਤਾ। ਭਾਰਤ ਦਾ ਅਗਲਾ ਮੁਕਾਬਲਾ ਵੀਰਵਾਰ ਨੂੰ ਚੀਨ ਨਾਲ ਹੋਵੇਗਾ, ਜਦਕਿ ਬੰਗਲਾਦੇਸ਼ ਦੀ ਟੱਕਰ ਮਲੇਸ਼ੀਆ ਨਾਲ ਹੋਵੇਗੀ। ਸਬੰਧਤ ਖਬਰ: Asian Hockey Championship: ਪੰਜਾਬ ਨੇ ਪਹਿਲੀ ਵਾਰ ਏਸ਼ੀਆਈ ਹਾਕੀ ਚੈਂਪੀਅਨਸ਼ਿਪ ਦੀ ਮੇਜ਼ਬਾਨੀ ਕੀਤੀ: ਭਗਵੰਤ ਮਾਨ