ਬੋਇਸ,(ਪੰਜਾਬੀ ਰਾਈਟਰ)- Idaho air show: ਪੱਛਮੀ ਆਇਡਾਹੋ ਵਿੱਚ ਮਾਊਂਟੇਨ ਹੋਮ ਏਅਰ ਫੋਰਸ ਬੇਸ 'ਤੇ ਇੱਕ ਹਵਾਈ ਪ੍ਰਦਰਸ਼ਨ (ਏਅਰ ਸ਼ੋਅ) ਦੌਰਾਨ ਐਤਵਾਰ ਨੂੰ ਜਲ ਸੈਨਾ ਦੇ ਦੋ ਲੜਾਕੂ ਜਹਾਜ਼ਾਂ ਦੇ ਆਪਸ ਵਿੱਚ ਟਕਰਾਉਣ ਅਤੇ ਹਾਦਸਾਗ੍ਰਸਤ ਹੋਣ ਤੋਂ ਬਾਅਦ ਚਾਲਕ ਦਲ ਦੇ ਚਾਰੇ ਮੈਂਬਰ ਸੁਰੱਖਿਅਤ ਬਾਹਰ ਨਿਕਲ ਗਏ। ਯੂ.ਐੱਸ. ਪੈਸੀਫਿਕ ਫਲੀਟ ਦੇ ਨੇਵਲ ਏਅਰ ਫੋਰਸਿਜ਼ ਦੀ ਬੁਲਾਰਨ ਕਮਾਂਡਰ ਅਮੇਲੀਆ ਉਮਾਯਾਮ ਨੇ ਦੱਸਿਆ ਕਿ ਇਸ ਟੱਕਰ ਵਿੱਚ ਵਾਸ਼ਿੰਗਟਨ ਦੇ ਵ੍ਹਿਡਬੇ ਆਈਲੈਂਡ ਵਿੱਚ ਸਥਿਤ ਇਲੈਕਟ੍ਰਾਨਿਕ ਅਟੈਕ ਸਕੁਐਡਰਨ 129 ਦੇ ਯੂ.ਐੱਸ. ਨੇਵੀ ਦੇ ਦੋ EA-18G ਗ੍ਰੋਲਰ (Growlers) ਜਹਾਜ਼ ਸ਼ਾਮਲ ਸਨ।

ਉਮਾਯਾਮ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਜਦੋਂ ਇਹ ਹਾਦਸਾ ਵਾਪਰਿਆ, ਉਸ ਸਮੇਂ ਜਹਾਜ਼ ਹਵਾਈ ਪ੍ਰਦਰਸ਼ਨ ਕਰ ਰਹੇ ਸਨ। ਉਨ੍ਹਾਂ ਦੱਸਿਆ ਕਿ ਦੋਵਾਂ ਜਹਾਜ਼ਾਂ ਦੇ ਚਾਲਕ ਦਲ ਦੇ ਚਾਰ ਮੈਂਬਰ ਸੁਰੱਖਿਅਤ ਬਾਹਰ ਨਿਕਲ ਗਏ ਅਤੇ ਹਾਦਸੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਬੇਸ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਚਾਲਕ ਦਲ ਦੇ ਮੈਂਬਰਾਂ ਦੀ ਹਾਲਤ ਸਥਿਰ ਹੈ। ਸਿਲਵਰ ਵਿੰਗਜ਼ ਆਫ਼ ਆਇਡਾਹੋ, ਜਿਸ ਨੇ ਹਵਾਈ ਪ੍ਰਦਰਸ਼ਨ ਦੀ ਯੋਜਨਾ ਬਣਾਉਣ ਵਿੱਚ ਮਦਦ ਕੀਤੀ ਸੀ, ਦੇ ਮਾਰਕੀਟਿੰਗ ਡਾਇਰੈਕਟਰ ਕਿਮ ਸਾਈਕਸ ਨੇ ਦੱਸਿਆ ਕਿ ਫ਼ੌਜੀ ਬੇਸ 'ਤੇ ਕੋਈ ਵੀ ਜ਼ਖ਼ਮੀ ਨਹੀਂ ਹੋਇਆ ਹੈ।

ਸਾਈਕਸ ਨੇ ਕਿਹਾ, "ਹਰ ਕੋਈ ਸੁਰੱਖਿਅਤ ਹੈ, ਅਤੇ ਮੈਨੂੰ ਲੱਗਦਾ ਹੈ ਕਿ ਇਹ ਸਭ ਤੋਂ ਮਹੱਤਵਪੂਰਨ ਗੱਲ ਹੈ।" ਬੇਸ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਵਿੱਚ ਕਿਹਾ ਕਿ ਹਾਦਸੇ ਦੇ ਤੁਰੰਤ ਬਾਅਦ ਬੇਸ ਨੂੰ ਲਾਕਡਾਊਨ (ਬੰਦ) ਕਰ ਦਿੱਤਾ ਗਿਆ ਸੀ ਅਤੇ ਬਾਕੀ ਦਾ ਹਵਾਈ ਪ੍ਰਦਰਸ਼ਨ ਰੱਦ ਕਰ ਦਿੱਤਾ ਗਿਆ।’’

ਦਰਸ਼ਕਾਂ ਵੱਲੋਂ ਇੰਟਰਨੈੱਟ 'ਤੇ ਪੋਸਟ ਕੀਤੀਆਂ ਗਈਆਂ ਵੀਡੀਓਜ਼ ਵਿੱਚ ਬੋਇਸ ਤੋਂ ਲਗਪਗ 50 ਮੀਲ (80 ਕਿਲੋਮੀਟਰ) ਦੱਖਣ ਵਿੱਚ ਬੇਸ ਦੇ ਨੇੜੇ ਜਹਾਜ਼ਾਂ ਦੇ ਜ਼ਮੀਨ 'ਤੇ ਡਿੱਗਣ ਦੌਰਾਨ ਅਸਮਾਨ ਵਿੱਚ ਚਾਰ ਪੈਰਾਸ਼ੂਟ ਖੁੱਲ੍ਹਦੇ ਦਿਖਾਈ ਦਿੱਤੇ। EA-18G ਗ੍ਰੋਲਰ, F/A-18 ਸੁਪਰ ਹਾਰਨੇਟ ਲੜਾਕੂ ਜਹਾਜ਼ ਦਾ ਇੱਕ ਰੂਪ ਹੈ ਜਿਸ ਵਿੱਚ ਆਧੁਨਿਕ ਇਲੈਕਟ੍ਰਾਨਿਕ ਯੁੱਧ ਪ੍ਰਣਾਲੀਆਂ ਹੁੰਦੀਆਂ ਹਨ।