ਟਰੰਪ ਦੇ ਸਖ਼ਤ ਆਲੋਚਕ ਲੁਈਜ਼ ਇਨਾਸੀਓ ਲੂਲਾ ਮੁੜ ਜਿੱਤੇ; ਚੌਥੀ ਵਾਰ ਬਣਨਗੇ ਰਾਸ਼ਟਰਪਤੀ
100 ਫੀਸਦੀ ਵੋਟਾਂ ਦੀ ਗਿਣਤੀ ਮਗਰੋਂ 44 ਲੱਖ ਵੋਟਾਂ ਦੀ ਬੜ੍ਹਤ ਨਾਲ ਹਾਸਲ ਕੀਤੀ ਇਤਿਹਾਸਕ ਜਿੱਤ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਦੇ ਸਖ਼ਤ ਆਲੋਚਕ ਰਹੇ ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਲੁਈਜ਼ ਇਨਾਸੀਓ ਲੂਲਾ ਦਾ ਸਿਲਵਾ ਐਤਵਾਰ ਨੂੰ ਮੁੜ ਰਾਸ਼ਟਰਪਤੀ ਚੁਣੇ ਗਏ ਹਨ। ਜੇਕਰ ਚੋਣ ਅਧਿਕਾਰੀ ਇਸ ਜਿੱਤ ਦੀ ਅਧਿਕਾਰਤ ਪੁਸ਼ਟੀ ਕਰ ਦਿੰਦੇ ਹਨ, ਤਾਂ ਉਹ ਚੌਥੀ ਵਾਰ ਦੇਸ਼ ਦੇ ਰਾਸ਼ਟਰਪਤੀ ਬਣਨਗੇ ਅਤੇ ਉਨ੍ਹਾਂ ਦਾ ਅਗਲਾ ਕਾਰਜਕਾਲ 5 ਜਨਵਰੀ 2027 ਤੋਂ ਸ਼ੁਰੂ ਹੋਵੇਗਾ। 100 ਫੀਸਦੀ ਵੋਟਾਂ ਦੀ ਗਿਣਤੀ ਮੁਕੰਮਲ ਹੋਣ ਤੋਂ ਬਾਅਦ, ਬ੍ਰਾਜ਼ੀਲ ਦੀ ਚੋਣ ਅਦਾਲਤ ਨੇ ਐਲਾਨ ਕੀਤਾ ਕਿ ਜਲਦੀ ਹੀ 81 ਸਾਲ ਦੇ ਹੋਣ ਜਾ ਰਹੇ ਲੂਲਾ ਨੇ ਆਪਣੇ ਵਿਰੋਧੀ ਫਲਾਵੀਓ ਬੋਲਸੋਨਾਰੋ 'ਤੇ ਕਰੀਬ 44 ਲੱਖ ਵੋਟਾਂ ਦੀ ਫੈਸਲਾਕੁੰਨ ਬੜ੍ਹਤ ਹਾਸਲ ਕਰ ਲਈ ਹੈ। ਪੋਲਿੰਗ ਦਾ ਸਮਾਂ ਖਤਮ ਹੋਣ ਤੋਂ ਠੀਕ ਪਹਿਲਾਂ ਸੁਪਰੀਮ ਕੋਰਟ ਦੇ ਇੱਕ ਜੱਜ ਵੱਲੋਂ ਵੋਟਿੰਗ ਦਾ ਸਮਾਂ ਦੋ ਘੰਟੇ ਵਧਾਉਣ ਦੇ ਫੈਸਲੇ ਕਾਰਨ ਪੋਲਿੰਗ ਸਟੇਸ਼ਨਾਂ 'ਤੇ ਕਾਫੀ ਹਫੜਾ-ਦਫੜੀ ਮਚ ਗਈ ਸੀ। ਬੋਲਸੋਨਾਰੋ ਇਸ ਫੈਸਲੇ ਖਿਲਾਫ ਕਾਨੂੰਨੀ ਕਾਰਵਾਈ ਕਰ ਸਕਦੇ ਹਨ। ਇਸ ਜਿੱਤ ਨਾਲ ਲਾਤੀਨੀ ਅਮਰੀਕਾ ਦੇ ਦੋ ਸਭ ਤੋਂ ਵੱਧ ਆਬਾਦੀ ਵਾਲੇ ਦੇਸ਼ਾਂ- ਮੈਕਸੀਕੋ ਅਤੇ ਬ੍ਰਾਜ਼ੀਲ ਵਿੱਚ ਖੱਬੇ-ਪੱਖੀ ਝੁਕਾਅ ਵਾਲੇ ਨੇਤਾਵਾਂ ਦੀ ਸੱਤਾ ਬਰਕਰਾਰ ਰਹੇਗੀ। ਨਤੀਜਿਆਂ ਦੇ ਐਲਾਨ ਦੇ ਨਾਲ ਹੀ ਸਾਓ ਪੌਲੋ ਦੇ ਉਸ ਹੋਟਲ ਦੇ ਅੰਦਰ ਅਤੇ ਬਾਹਰ ਸਮਰਥਕਾਂ ਨੇ ਜਸ਼ਨ ਮਨਾਉਣਾ ਸ਼ੁਰੂ ਕਰ ਦਿੱਤਾ, ਜਿੱਥੇ ਲੂਲਾ ਆਪਣੀ ਪਤਨੀ ਰੋਜਾਂਗੇਲਾ ਨਾਲ ਮੌਜੂਦ ਸਨ। ਬ੍ਰਾਜ਼ੀਲ ਵਿੱਚ 1985 ਦੀ ਫੌਜੀ ਤਾਨਾਸ਼ਾਹੀ ਦੇ ਅੰਤ ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ ਪਹਿਲੇ ਗੇੜ ਵਿੱਚ ਦੂਜੇ ਸਥਾਨ 'ਤੇ ਰਹਿਣ ਵਾਲੇ ਉਮੀਦਵਾਰ ਨੇ ਰਾਸ਼ਟਰਪਤੀ ਚੋਣ ਜਿੱਤੀ ਹੈ। ਪਹਿਲੇ ਗੇੜ ਵਿੱਚ ਬੋਲਸੋਨਾਰੋ ਨੂੰ 47% ਅਤੇ ਲੂਲਾ ਨੂੰ 45% ਵੋਟਾਂ ਮਿਲੀਆਂ ਸਨ। ਬੋਲਸੋਨਾਰੋ ਦੇ ਸਹਿਯੋਗੀ ਨਿਕੋਲਸ ਫਰੇਰਾ ਨੇ ਧਿਆਨ ਦਿਵਾਇਆ ਕਿ ਵੋਟਿੰਗ ਦਾ ਸਮਾਂ ਵਧਾਉਣ ਵਾਲੇ ਜੱਜ ਜ਼ਾਨਿਨ ਪਹਿਲਾਂ ਲੂਲਾ ਦੇ ਵਕੀਲ ਰਹਿ ਚੁੱਕੇ ਹਨ। ਮਹਿੰਗਾਈ ਅਤੇ ਸੁਰੱਖਿਆ ਕਾਰਨ ਲੂਲਾ ਲਈ ਮੁੜ ਚੋਣ ਜਿੱਤਣਾ ਔਖਾ ਸੀ। ਬੋਲਸੋਨਾਰੋ ਨੇ ਅਪਰਾਧਾਂ ਪ੍ਰਤੀ ਸਖ਼ਤ ਰੁਖ਼ ਅਤੇ ਸਸਤੇ ਭੋਜਨ ਦਾ ਵਾਅਦਾ ਕੀਤਾ ਸੀ, ਜਦਕਿ ਲੂਲਾ ਨੇ ਪ੍ਰੋਤਸਾਹਨ ਯੋਜਨਾਵਾਂ 'ਤੇ ਜ਼ੋਰ ਦਿੱਤਾ। 70 ਦੇ ਦਹਾਕੇ ਵਿੱਚ ਟਰੇਡ ਯੂਨੀਅਨ ਨੇਤਾ ਵਜੋਂ ਸਿਆਸਤ ਵਿੱਚ ਆਏ ਲੂਲਾ ਨੇ 2002 ਅਤੇ 2006 ਵਿੱਚ ਵੀ ਜਿੱਤ ਦਰਜ ਕੀਤੀ ਸੀ। ਬਾਅਦ ਵਿੱਚ ਉਨ੍ਹਾਂ ਨੂੰ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਹੇਠ 580 ਦਿਨ ਜੇਲ੍ਹ ਕੱਟਣੀ ਪਈ ਸੀ, ਪਰ ਬਾਅਦ ਵਿੱਚ ਸੁਪਰੀਮ ਕੋਰਟ ਨੇ ਸਜ਼ਾ ਰੱਦ ਕਰ ਦਿੱਤੀ। ਹੁਣ ਲੂਲਾ ਅਮਰੀਕੀ ਮਹਾਂਦੀਪ ਦੇ ਸਭ ਤੋਂ ਵੱਡੀ ਉਮਰ ਦੇ ਰਾਸ਼ਟਰਪਤੀਆਂ ਵਿੱਚ ਸ਼ਾਮਲ ਹੋ ਗਏ ਹਨ।