ਨਿਊਯਾਰਕ, 2 ਮਈ (ਅਰਜਨ ਰਿਆੜ/ਧੀਰਜ ਛੋਕਰ ਨਿਊਯਾਰਕ)- ਅਮਰੀਕਾ ਅਤੇ ਮੈਕਸੀਕੋ ਦੀ ਅੰਤਰਰਾਸ਼ਟਰੀ ਸਰਹੱਦ 'ਤੇ ਸੁਰੱਖਿਆ ਏਜੰਸੀਆਂ ਵੱਲੋਂ ਇੱਕ ਬਹੁਤ ਹੀ ਹਾਈਟੈਕ ਅਤੇ ਗੁਪਤ ਸਰਹੱਦ ਪਾਰਲੀ ਸੁਰੰਗ ਦੀ ਨਿਸ਼ਾਨਦੇਹੀ ਕੀਤੇ ਜਾਣ ਦੀ ਅਹਿਮ ਖ਼ਬਰ ਸਾਹਮਣੇ ਆਈ ਹੈ। ਇਹ ਖ਼ੁਫ਼ੀਆ ਸੁਰੰਗ ਕੈਲੀਫੋਰਨੀਆ ਦੇ ਸੈਨ ਡਿਏਗੋ ਸ਼ਹਿਰ ਦੇ ਨੇੜੇ ਸਥਿਤ ਉਦਯੋਗਿਕ ਖੇਤਰ ਓਟੇ ਮੇਸਾ ਦੇ ਕੋਲੋਂ ਲੰਘਦੀ ਸਰਹੱਦੀ ਕੰਧ ਦੇ ਹੇਠੋਂ ਬਣਾਈ ਗਈ ਸੀ। ਅਮਰੀਕੀ ਹੋਮਲੈਂਡ ਸਿਕਿਉਰਿਟੀ ਇਨਵੈਸਟੀਗੇਸ਼ਨਜ਼ (ਐਚ.ਐਸ.ਆਈ) ਅਤੇ ਯੂ.ਐਸ. ਬਾਰਡਰ ਪੈਟਰੋਲ ਦੀ ਸਾਂਝੀ ਟਾਸਕ ਫੋਰਸ ਨੇ ਇੱਕ ਗੁਪਤ ਸੂਚਨਾ ਦੇ ਆਧਾਰ 'ਤੇ ਚਲਾਈ ਗਈ ਵਿਸ਼ੇਸ਼ ਮੁਹਿੰਮ ਦੌਰਾਨ ਇਸ ਸੁਰੰਗ ਦਾ ਪਰਦਾਫਾਸ਼ ਕੀਤਾ ਹੈ। ਮੈਕਸੀਕੋ ਦੇ ਅਧਿਕਾਰੀਆਂ ਨੇ ਇਸ ਹਾਈਟੈਕ ਨੈੱਟਵਰਕ ਨੂੰ ਨਸ਼ਟ ਕਰਨ ਲਈ ਅਮਰੀਕੀ ਸੁਰੱਖਿਆ ਏਜੰਸੀਆਂ ਨਾਲ ਵੀ ਤਾਲਮੇਲ ਕੀਤਾ ਹੈ, ਤਾਂ ਜੋ ਸਰਹੱਦ ਦੇ ਦੋਵਾਂ ਪਾਸਿਆਂ ਤੋਂ ਤਸਕਰਾਂ 'ਤੇ ਸ਼ਿਕੰਜਾ ਕੱਸਿਆ ਜਾ ਸਕੇ।
 

ਸੁਰੱਖਿਆ ਅਧਿਕਾਰੀਆਂ ਵੱਲੋਂ ਜਾਰੀ ਕੀਤੇ ਗਏ ਅਧਿਕਾਰਤ ਵੇਰਵਿਆਂ ਮੁਤਾਬਕ, ਇਹ ਸੁਰੰਗ ਮੈਕਸੀਕੋ ਦੇ ਟਿਜੁਆਨਾ ਸ਼ਹਿਰ ਵਿੱਚ ਸਥਿਤ ਇੱਕ ਨਿੱਜੀ ਘਰ ਤੋਂ ਸ਼ੁਰੂ ਹੁੰਦੀ ਸੀ ਅਤੇ ਅਮਰੀਕਾ ਦੇ ਓਟੇ ਮੇਸਾ ਖੇਤਰ ਵਿੱਚ ਬਣੇ ਇੱਕ ਵੱਡੇ ਵਪਾਰਕ ਗੋਦਾਮ (ਵੇਅਰਹਾਊਸ) ਦੇ ਅੰਦਰ ਆ ਕੇ ਖੁੱਲ੍ਹਦੀ ਸੀ। ਇਹ ਸੁਰੰਗ ਲਗਭਗ 1,700 ਫੁੱਟ ਲੰਮੀ ਹੈ ਅਤੇ ਜ਼ਮੀਨ ਤੋਂ ਲਗਭਗ 60 ਫੁੱਟ ਦੀ ਡੂੰਘਾਈ 'ਤੇ ਬਣਾਈ ਗਈ ਸੀ। ਜਾਂਚ ਏਜੰਸੀਆਂ ਮੁਤਾਬਕ, ਇਸ ਸੁਰੰਗ ਦੇ ਅੰਦਰ ਬਿਜਲੀ ਸਪਲਾਈ, ਹਵਾ ਦੀ ਆਵਾਜਾਈ ਲਈ ਵੈਂਟੀਲੇਸ਼ਨ ਸਿਸਟਮ ਅਤੇ ਨਸ਼ੀਲੇ ਪਦਾਰਥਾਂ ਨੂੰ ਤੇਜ਼ੀ ਨਾਲ ਇੱਧਰ-ਉੱਧਰ ਲਿਜਾਣ ਲਈ ਇੱਕ ਰੇਲ-ਟਰੈਕ (ਪਟੜੀ) ਸਿਸਟਮ ਵੀ ਲਗਾਇਆ ਹੋਇਆ ਸੀ, ਜੋ ਇਸ ਨੂੰ ਬੇਹੱਦ ਪੇਸ਼ੇਵਰ ਤਰੀਕੇ ਨਾਲ ਤਿਆਰ ਕੀਤੇ ਜਾਣ ਵੱਲ ਇਸ਼ਾਰਾ ਕਰਦਾ ਹੈ। 

ਫੈਡਰਲ ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਕਾਰਵਾਈ ਦੌਰਾਨ ਕਰੋੜਾਂ ਰੁਪਏ ਦੀ ਅੰਤਰਰਾਸ਼ਟਰੀ ਕੀਮਤ ਵਾਲੇ ਨਸ਼ੀਲੇ ਪਦਾਰਥ, ਜਿਨ੍ਹਾਂ ਵਿੱਚ ਭਾਰੀ ਮਾਤਰਾ ਵਿੱਚ ਕੋਕੀਨ, ਮੈਥਾਮਫੇਟਾਮਾਈਨ ਅਤੇ ਫੈਂਟਾਨਿਲ ਸ਼ਾਮਲ ਹਨ, ਬਰਾਮਦ ਕੀਤੇ ਗਏ ਹਨ। ਇਸ ਦੇ ਨਾਲ ਹੀ ਸੁਰੰਗ ਰਾਹੀਂ ਤਸਕਰੀ ਅਤੇ ਗੈਰ-ਕਾਨੂੰਨੀ ਘੁਸਪੈਠ ਕਰਨ ਦੇ ਦੋਸ਼ਾਂ ਤਹਿਤ 6 ਨਸ਼ਾ ਤਸਕਰਾਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।