ਨਵੀਂ ਦਿੱਲੀ-ਸਰਕਾਰ ਨੇ ਸੰਸਦ ਭਵਨ ਕੰਪਲੈਕਸ ਦੀ ਸੁਰੱਖਿਆ ਵਿਚ ਹਾਲ ਹੀ ਵਿੱਚ ਲੱਗੀ ਸੰਨ੍ਹ ਦੀ ਘਟਨਾ ਮਗਰੋਂ ਇਸ ਦੀ ਸੁਰੱਖਿਆ ਦਾ ਜ਼ਿੰਮਾ ਕੇਂਦਰੀ ਸਨਅਤੀ ਸੁਰੱਖਿਆ ਬਲ (ਸੀਆਈਐੱਸਐੱਫ) ਹਵਾਲੇ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਇਹ ਜਾਣਕਾਰੀ ਅਧਿਕਾਰਤ ਸੂਤਰਾਂ ਨੇ ਦਿੱਤੀ।ਸੀਆਈਐੱਸਐੱਫ ਹਵਾਈ ਅੱਡਿਆਂ ਦੀ ਸੁਰੱਖਿਆ ਦੀ ਤਰ੍ਹਾਂ ਨਵੇਂ ਤੇ ਪੁਰਾਣੇ ਸੰਸਦੀ ਕੰਪਲੈਕਸ ਤੱਕ ਸੁਰੱਖਿਆ ਨੂੰ ਕੰਟਰੋਲ ਕਰੇਗਾ ਜਿੱਥੇ ਵਿਅਕਤੀਆਂ ਦੇ ਸਰੀਰ ਦੀ ਤਲਾਸ਼ੀ ਹੱਥ ਨਾਲ ਫੜੇ ਜਾਣ ਵਾਲੇ ਡਿਟੈਕਟਰਾਂ ਰਾਹੀਂ ਲਈ ਜਾਵੇਗੀ ਅਤੇ ਉਨ੍ਹਾਂ ਦੇ ਸਾਮਾਨ ਦੀ ਜਾਂਚ ਐਕਸ-ਰੇਅ ਮਸ਼ੀਨਾਂ ਰਾਹੀਂ ਕੀਤੀ ਜਾਵੇਗੀ। ਜੁੱਤਿਆਂ, ਭਾਰੀ ਜੈਕੇਟਾਂ ਤੇ ਬੈਲਟਾਂ ਨੂੰ ਇੱਕ ਟਰੇਅ ’ਤੇ ਰੱਖ ਕੇ ਤੇ ਸਕੈਨਰ ’ਚੋਂ ਲੰਘਾ ਕੇ ਸਕੈਨ ਕੀਤਾ ਜਾਵੇਗਾ। ਇਸ ਤੋਂ ਪਹਿਲਾਂ ਸੰਸਦੀ ਕੰਪਲੈਕਸ ’ਚ ਜਾਣ ਵਾਲੇ ਲੋਕਾਂ ਦੀ ਜਾਂਚ ਦੀ ਜ਼ਿੰਮੇਵਾਰੀ ਦਿੱਲੀ ਪੁਲੀਸ ਹਵਾਲੇ ਸੀ। ਸੀਆਈਐੱਸਐੱਫ ਇੱਕ ਕੇਂਦਰੀ ਹਥਿਆਰਬੰਦ ਪੁਲੀਸ ਬਲ (ਸੀਏਪੀਐੱਫ) ਹੈ ਜੋ ਇਸ ਸਮੇਂ ਪ੍ਰਮਾਣੂ ਤੇ ਏਅਰੋਸਪੇਸ ਡੋਮੇਨ (ਉਡਾਣ ਉਦਯੋਗ ਸਬੰਧੀ) ਅਧੀਨ ਆਉਂਦੇ ਅਦਾਰਿਆਂ, ਨੀਮ ਫੌਜੀ ਹਵਾਈ ਅੱਡਿਆਂ ਅਤੇ ਦਿੱਲੀ ਮੈਟਰੋ ਤੋਂ ਇਲਾਵਾ ਕੌਮੀ ਰਾਜਧਾਨੀ ’ਚ ਕਈ ਕੇਂਦਰੀ ਮੰਤਰਾਲਿਆਂ ਦੇ ਭਵਨਾਂ ਦੀ ਸੁਰੱਖਿਆ ਕਰਦਾ ਹੈ। ਸੂਤਰਾਂ ਨੇ ਦੱਸਿਆ ਕਿ ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਬੀਤੇ ਦਿਨ ਸੰਸਦੀ ਭਵਨ ਕੰਪਲੈਕਸ ਨੂੰ ਇਸ ਸਬੰਧੀ ਨਿਰਦੇਸ਼ ਦਿੱਤਾ ਤਾਂ ਜੋ ਵੱਡੇ ਪੱਧਰ ’ਤੇ ਸੀਆਈਐੱਸਐੱਫ ਸੁਰੱਖਿਆ ਤੇ ਫਾਇਰ ਬ੍ਰਿਗੇਡ ਦੀ ਇਕਾਈ ਪੱਕੇ ਤੌਰ ’ਤੇ ਤਾਇਨਾਤ ਕੀਤੀ ਜਾ ਸਕੇ। ਸੰਸਦ ਭਵਨ ਦੀ ਸਾਰੀ ਸੁਰੱਖਿਆ ਸੀਆਈਐੱਸਐੱਫ ਹਵਾਲੇ ਕਰਨ ਦਾ ਫ਼ੈਸਲਾ ਗ੍ਰਹਿ ਮੰਤਰਾਲੇ ਵੱਲੋਂ ਸਿਧਾਂਤਕ ਮਨਜ਼ੂਰੀ ਦਿੱਤੇ ਜਾਣ ਤੋਂ ਬਾਅਦ ਕੀਤਾ ਗਿਆ ਸੀ। ਸੁਰੱਖਿਆ ਦੀ ਨਿਗਰਾਨੀ ਤੇ ਵਾਰਡ ਦੇ ਮੈਂਬਰਾਂ ਨੂੰ ਵੀ ਸੀਆਈਐੱਸਐੱਫ ਕੇਂਦਰ ’ਚ ਮਨੁੱਖੀ ਤੇ ਸਾਮਾਨ ਦੀ ਜਾਂਚ ਦੀ ਸਿਖਲਾਈ ਦੇਣ ਲਈ ਬੈਚਾਂ ਵਿਚ ਭੇਜਿਆ ਜਾਵੇਗਾ। ਕੇਂਦਰ ਸਰਕਾਰ ਦੇ ਮੰਤਰਾਲਿਆਂ ਦੀ ਸੁਰੱਖਿਆ ਕਰਨ ਵਾਲੀ ਸੀਆਈਐੱਸਐੱਫ ਦੀ ਸਰਕਾਰੀ ਭਵਨ ਸੁਰੱਖਿਆ ਇਕਾਈ ਦੇ ਮਾਹਿਰ ਅਤੇ ਮੌਜੂਦਾ ਸੰਸਦੀ ਸੁਰੱਖਿਆ ਟੀਮ ਦੇ ਅਧਿਕਾਰੀਆਂ ਨਾਲ ਫਾਇਰ ਬ੍ਰਿਗੇਡ ਤੇ ਬਚਾਅ ਅਧਿਕਾਰੀ ਇਸ ਹਫ਼ਤੇ ਦੇ ਅੰਤ ’ਚ ਸਰਵੇਖਣ ਸ਼ੁਰੂ ਕਰਨਗੇ।ਨਵੀਂ ਦਿੱਲੀ/ਬਾਗਲਕੋਟ (ਕਰਨਾਟਕ): ਦਿੱਲੀ ਪੁਲੀਸ ਨੇ ਸੰਸਦ ਦੀ ਸੁਰੱਖਿਆ ’ਚ ਸੰਨ੍ਹ ਦੇ ਮਾਮਲੇ ’ਚ ਦੋ ਹੋਰ ਵਿਅਕਤੀਆਂ ਤੋਂ ਪੁੱਛ ਪੜਤਾਲ ਕੀਤੀ ਹੈ। ਸੂਤਰਾਂ ਨੇ ਅੱਜ ਇਹ ਜਾਣਕਾਰੀ ਦਿੱਤੀ। ਪੁਲੀਸ ਦੇ ਸੂਤਰਾਂ ਨੇ ਦੱਸਿਆ ਕਿ ਜਿਨ੍ਹਾਂ ਦੋ ਜਣਿਆਂ ਤੋਂ ਪੁੱਛ-ਪੜਤਾਲ ਕੀਤੀ ਗਈ ਹੈ ਉਨ੍ਹਾਂ ’ਚੋਂ ਇੱਕ ਸਾਈਕ੍ਰਿਸ਼ਨ ਜਾਗਲੀ ਮੁਲਜ਼ਮ ਮਨੋਰੰਜਨ ਡੀ ਦਾ ਕਰੀਬੀ ਮਿੱਤਰ ਹੈ ਅਤੇ ਕਰਨਾਟਕ ਦਾ ਰਹਿਣ ਵਾਲਾ ਹੈ। ਦੂਜਾ ਵਿਅਕਤੀ ਉੱਤਰ ਪ੍ਰਦੇਸ਼ ਦਾ ਰਹਿਣ ਵਾਲਾ ਹੈ। ਉਨ੍ਹਾਂ ਦੱਸਿਆ ਕਿ ਪੁਲੀਸ ਦੀ ਵਿਸ਼ੇਸ਼ ਟੀਮ ਨੇ ਬੀਤੇ ਦਿਨ ਦੋਵਾਂ ਤੋਂ ਪੁੱਛ ਪੜਤਾਲ ਕੀਤੀ। ਸੂਤਰਾਂ ਨੇ ਦੱਸਿਆ ਕਿ ਜਾਗਲੀ ਇੱਕ ਤਕਨੀਕੀ ਮਾਹਿਰ ਹੈ ਅਤੇ ਉਹ ਸੇਵਾਮੁਕਤ ਡੀਐੱਸਪੀ ਦਾ ਪੁੱਤਰ ਹੈ। ਦਿੱਲੀ ਪੁਲੀਸ ਦੀ ਟੀਮ ਨੇ ਲੰਘੀ ਰਾਤ ਬਾਗਲਕੋਟ ਦੇ ਵਿਦਿਆਗਿਰੀ ਸ਼ਹਿਰ ਸਥਿਤ ਉਸ ਦੇ ਘਰੋਂ ਉਸ ਨੂੰ ਹਿਰਾਸਤ ਵਿੱਚ ਲਿਆ। ਜਾਗਲੀ ਦੀ ਭੈਣ ਸਪੰਦਾ ਨੇ ਦੱਸਿਆ ਕਿ ਉਹ ਬੰਗਲੂਰੂ ’ਚ ਇੱਕ ਬਹੁ-ਕੌਮੀ ਕੰਪਨੀ ’ਚ ਕੰਮ ਕਰਦਾ ਹੈ ਤੇ ਉਹ ਮਨੋਰੰਜਨ ਦੇ ਕਾਲਜ ਦੇ ਦਿਨਾਂ ’ਚ ਉਸ ਨਾਲ ਰਹਿੰਦਾ ਸੀ। ਉਨ੍ਹਾਂ ਕਿਹਾ ਕਿ ਦਿੱਲੀ ਪੁਲੀਸ ਦੀ ਟੀਮ ਉਸ ਦੇ ਭਰਾ ਨੂੰ ਇਹ ਕਹਿ ਕੇ ਆਪਣੇ ਨਾਲ ਲੈ ਗਈ ਕਿ ਉਸ ਨੇ ਕੁਝ ਵੀ ਗਲਤ ਨਹੀਂ ਕੀਤਾ ਹੈ।