ਅਮਰੀਕੀ ਇਤਿਹਾਸ ’ਚ ਚੋਣ ਜਿੱਤਣ ਵਾਲੇ ਪਹਿਲੇ ਐਲਾਨੀਆਂ ਸਮਲਿੰਗੀ ਬਣੇ
ਵਾਸ਼ਿੰਗਟਨ/ਨਿਊਯਾਰਕ, 4 ਨਵੰਬਰ (ਅਰਜਨ ਰਿਆੜ, ਧੀਰਜ ਛੋਕਰਾਂ)- ਅਮਰੀਕਾ ਦੇ ਨਿਊ ਹੈਂਪਸ਼ਾਇਰ ਸੂਬੇ ਤੋਂ ਕਿ੍ਰਸ ਪੱਪਾਸ ਨੇ ਸੈਨੇਟ ਚੋਣ ਜਿੱਤ ਕੇ ਨਵਾਂ ਇਤਿਹਾਸ ਸਿਰਜਿਆ ਹੈ। ਉਹ ਅਮਰੀਕੀ ਸੈਨੇਟ ਲਈ ਚੁਣੇ ਜਾਣ ਵਾਲੇ ਪਹਿਲੇ ਖੁੱਲ੍ਹੇ ਤੌਰ ’ਤੇ ਸਮਲਿੰਗੀ ਪੁਰਸ਼ ਬਣ ਗਏ ਹਨ। ਆਪਣੀ ਜਿੱਤ ਤੋਂ ਬਾਅਦ ਦਿੱਤੇ ਸਵੀਕਿ੍ਰਤੀ ਭਾਸ਼ਣ ਦੌਰਾਨ ਉਨ੍ਹਾਂ ਨੇ ਆਪਣੇ ਪਤੀ ਦਾ ਵਿਸ਼ੇਸ਼ ਤੌਰ ’ਤੇ ਧੰਨਵਾਦ ਕੀਤਾ।
ਆਪਣੇ ਭਾਸ਼ਣ ਦੌਰਾਨ ਕਿ੍ਰਸ ਪੱਪਾਸ ਨੇ ਕਿਹਾ ਕਿ ਉਹ ਆਪਣੇ ਪਰਿਵਾਰ, ਮਾਪਿਆਂ ਅਤੇ ਖਾਸ ਕਰਕੇ ਆਪਣੇ ਪਤੀ ਵੈਨ ਬੈਂਟਲੇ ਦੇ ਧੰਨਵਾਦੀ ਹਨ, ਜੋ ਹਰ ਮੁਸ਼ਕਲ ਸਮੇਂ ਉਨ੍ਹਾਂ ਦੇ ਨਾਲ ਖੜ੍ਹੇ ਰਹੇ। ਉਨ੍ਹਾਂ ਨੇ ਆਪਣੇ ਪਤੀ ਵੱਲ ਇਸ਼ਾਰਾ ਕਰਦਿਆਂ ਕਿਹਾ, “ਮੈਂ ਸਭ ਤੋਂ ਖੁਸ਼ਕਿਸ਼ਮਤ ਵਿਅਕਤੀ ਹਾਂ, ਕਿਉਂਕਿ ਮੇਰਾ ਵਿਆਹ ਉਸ ਇਨਸਾਨ ਨਾਲ ਹੋਇਆ ਹੈ ਜਿਸ ਨੂੰ ਮੈਂ ਪਿਆਰ ਕਰਦਾ ਹਾਂ।” ਇਸ ਮੌਕੇ ਉਨ੍ਹਾਂ ਨੇ ਆਪਣੇ ਪਤੀ ਨੂੰ ਸਟੇਜ ’ਤੇ ਗਲੇ ਵੀ ਲਗਾਇਆ। ਉਨ੍ਹਾਂ ਕਿਹਾ ਕਿ ਚੋਣਾਂ ਵਿੱਚ ਜਿੱਤ ਹੋਵੇ ਜਾਂ ਹਾਰ, ਉਨ੍ਹਾਂ ਲਈ ਆਪਣੇ ਜੀਵਨ ਸਾਥੀ ਦਾ ਸਾਥ ਸਭ ਤੋਂ ਮਹੱਤਵਪੂਰਨ ਹੈ।  46 ਸਾਲਾ ਕਿ੍ਰਸ ਪੱਪਾਸ ਡੈਮੋਕ੍ਰੇਟਿਕ ਪਾਰਟੀ ਨਾਲ ਸਬੰਧਤ ਹਨ। ਉਹ 2018 ਵਿੱਚ ਪਹਿਲੀ ਵਾਰ ਅਮਰੀਕੀ ਪ੍ਰਤੀਨਿਧੀ ਸਭਾ ਲਈ ਚੁਣੇ ਗਏ ਸਨ ਅਤੇ ਨਿਊ ਹੈਂਪਸਾਇਰ ਦੇ ਪਹਿਲੇ ਖੁੱਲ੍ਹੇ ਤੌਰ ’ਤੇ ਪਛਾਣ ਵਾਲੇ ਕਾਂਗਰਸ ਮੈਂਬਰ ਬਣੇ ਸਨ। 3 ਨਵੰਬਰ 2026 ਨੂੰ ਹੋਈ ਚੋਣ ਵਿੱਚ ਉਨ੍ਹਾਂ ਨੇ ਰਿਪਬਲਿਕਨ ਪਾਰਟੀ ਦੇ ਸਾਬਕਾ ਸੈਨੇਟਰ ਜੌਨ ਈ. ਸੁਨੂਨੂ ਨੂੰ ਹਰਾਇਆ। ਉਹ ਸੇਵਾਮੁਕਤ ਹੋ ਰਹੀ ਸੈਨੇਟਰ ਜੀਨ ਸਾਹੀਨ ਦੀ ਥਾਂ ਲੈਣਗੇ।  
ਅਮਰੀਕੀ ਸਿਆਸਤ ਵਿੱਚ ਨਵਾਂ ਇਤਿਹਾਸ
ਕਿ੍ਰਸ ਪੱਪਾਸ ਦੀ ਜਿੱਤ ਅਮਰੀਕੀ ਸਿਆਸਤ ਵਿੱਚ ਇੱਕ ਇਤਿਹਾਸਕ ਘਟਨਾ ਵਜੋਂ ਦਰਜ ਹੋਈ ਹੈ। ਉਹ ਅਮਰੀਕੀ ਸੈਨੇਟ ਲਈ ਚੁਣੇ ਜਾਣ ਵਾਲੇ ਪਹਿਲੇ ਖੁੱਲ੍ਹੇ ਤੌਰ ’ਤੇ ਸਮਲਿੰਗੀ ਪੁਰਸ਼ ਹਨ। ਉਨ੍ਹਾਂ ਦੀ ਜਿੱਤ ਨੇ ਅਮਰੀਕੀ ਰਾਜਨੀਤੀ ਵਿੱਚ ਨੁਮਾਇੰਦਗੀ ਅਤੇ ਵਿਭਿੰਨਤਾ ਨਾਲ ਜੁੜੀ ਨਵੀਂ ਚਰਚਾ ਨੂੰ ਵੀ ਸਾਹਮਣੇ ਲਿਆਂਦਾ ਹੈ।