ਨਿਊਯਾਰਕ, 4 ਅਕਤੂਬਰ (ਅਰਜਨ ਰਿਆੜ, ਧੀਰਜ ਛੋਕਰਾਂ)-  ਓਜ਼ੋਨ ਪਾਰਕ ਨਾਲ ਸਬੰਧਤ ਸਾਬਕਾ NYPD ਸਰਜੈਂਟ ਅਟਿਕੁਲ ਇਸਲਾਮ (29) ਨੇ ਬੁੱਧਵਾਰ ਨੂੰ ਬਰੂਕਲਿਨ ਦੀ ਫੈੱਡਰਲ ਅਦਾਲਤ ਵਿੱਚ ਇੱਕ ਇਮੀਗ੍ਰੈਂਟ ਮਹਿਲਾ ਨੂੰ ਧਮਕਾਉਣ ਲਈ ਖੁਦ ਨੂੰ ICE ਅਧਿਕਾਰੀ ਵਜੋਂ ਪੇਸ਼ ਕਰਨ ਦੇ ਦੋਸ਼ ਕਬੂਲ ਕਰ ਲਏ। ਫੈੱਡਰਲ ਪ੍ਰੋਸੀਕਿਊਟਰਾਂ ਮੁਤਾਬਕ, ਮਹਿਲਾ ਵੱਲੋਂ ਇਸਲਾਮ ਦੇ ਪ੍ਰੇਮ-ਸਬੰਧੀ ਪ੍ਰਸਤਾਵ ਨੂੰ ਠੁਕਰਾਉਣ ਤੋਂ ਬਾਅਦ ਉਸ ਨੇ ਉਸ ਨੂੰ ਟੈਕਸਟ ਸੁਨੇਹਾ ਭੇਜ ਕੇ ਧਮਕੀ ਦਿੱਤੀ ਕਿ 935 ਉਸ ਦੇ ਪਰਿਵਾਰ ਨੂੰ ਲੈਣ ਲਈ ਆਵੇਗੀ। ਕੁਝ ਘੰਟਿਆਂ ਬਾਅਦ ਇਸਲਾਮ ਨੇ ਇੱਕ ਅਣਪਛਾਤੇ ਨੰਬਰ ਤੋਂ ਮੁੜ ਸੁਨੇਹਾ ਭੇਜਿਆ। ਇਸ ਵਾਰ ਉਸ ਨੇ ਖੁਦ ਨੂੰ 935 ਦੇ ਨਿਊਯਾਰਕ ਫੀਲਡ ਆਫਿਸ ਦੇ ਡਾਇਰੈਕਟਰ ਵਜੋਂ ਪੇਸ਼ ਕੀਤਾ ਅਤੇ ਪਰਿਵਾਰ ਨੂੰ ICE ਦੇ ਦਫ਼ਤਰ ਵਿੱਚ ਰਿਪੋਰਟ ਕਰਨ ਦਾ ਹੁਕਮ ਦਿੱਤਾ। ਮਾਮਲੇ ਵਿੱਚ ਦੋਸ਼ ਕਬੂਲ ਕਰਨ ਦੇ ਹਿੱਸੇ ਵਜੋਂ ਇਸਲਾਮ ਨੇ NYPD ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ ਅਤੇ ਉਸ ਨੂੰ ਭਵਿੱਖ ਵਿੱਚ ਕਾਨੂੰਨ ਲਾਗੂ ਕਰਨ ਵਾਲੀ ਕਿਸੇ ਵੀ ਨੌਕਰੀ ਵਿੱਚ ਕੰਮ ਕਰਨ ਤੋਂ ਸਥਾਈ ਤੌਰ ’ਤੇ ਰੋਕ ਦਿੱਤਾ ਗਿਆ ਹੈ। ਅਦਾਲਤੀ ਕਾਰਵਾਈ ਅਨੁਸਾਰ, ਇਸਲਾਮ ਨੂੰ ਮਾਰਚ ਵਿੱਚ ਸਜ਼ਾ ਸੁਣਾਈ ਜਾਵੇਗੀ ਅਤੇ ਉਸ ਨੂੰ ਫੈੱਡਰਲ ਜੇਲ੍ਹ ਵਿੱਚ ਵੱਧ ਤੋਂ ਵੱਧ ਤਿੰਨ ਸਾਲ ਤੱਕ ਦੀ ਸਜ਼ਾ ਹੋ ਸਕਦੀ ਹੈ।