ਨਿਊਯਾਰਕ, 26 ਸਤੰਬਰ (ਪੰਜਾਬੀ ਰਾਈਟਰ)- ਚਾਰ ਸਾਲ ਤੋਂ ਵੱਧ ਸਮਾਂ ਪਹਿਲਾਂ ਕੈਂਪਸ ਨੇੜੇ ਇੱਕ ਬੇਵਜ੍ਹਾ ਹਮਲੇ ਦੌਰਾਨ ਕੋਲੰਬੀਆ ਯੂਨੀਵਰਸਿਟੀ ਦੇ ਇੱਕ ਵਿਦਿਆਰਥੀ ਦੀ ਹੱਤਿਆ ਕਰਨ ਵਾਲੇ ਵਿਅਕਤੀ ਨੂੰ ਮਾਣਯੋਗ ਅਦਾਲਤ ਵਲੋਂ ਸ਼ੁੱਕਰਵਾਰ ਨੂੰ ਸਜ਼ਾ ਸੁਣਾਈ ਗਈ। ਪੀੜਤ ਡੇਵਿਡ ਗਿਰੀ ਦੇ ਪਰਿਵਾਰਕ ਮੈਂਬਰ ਅਦਾਲਤ ਵਿੱਚ ਹਾਜ਼ਰ ਹੋਣ ਅਤੇ ਜੱਜ ਨੂੰ ਸੰਬੋਧਨ ਕਰਨ ਲਈ ਇਟਲੀ ਤੋਂ ਆਏ ਸਨ। ਗਿਰੀ (30) ਕੋਲੰਬੀਆ ਯੂਨੀਵਰਸਿਟੀ ਵਿੱਚ ਪੀ.ਐੱਚ.ਡੀ. ਵਿਦਿਆਰਥੀ ਸੀ। ਦਸੰਬਰ 2021 ਵਿੱਚ, ਉਹ ਫੁਟਬਾਲ ਅਭਿਆਸ ਤੋਂ ਵਾਪਸ ਆ ਰਿਹਾ ਸੀ ਜਦੋਂ ਵਿਨਸੈਂਟ ਪਿੰਕਨੀ ਨੇ ਮੌਰਨਿੰਗਸਾਈਡ ਪਾਰਕ ਨੇੜੇ ਉਸ ’ਤੇ ਬੇਵਜ੍ਹਾ ਚਾਕੂ ਨਾਲ ਹਮਲਾ ਕਰਕੇ ਉਸਦੀ ਹੱਤਿਆ ਕਰ ਦਿੱਤੀ। ਗਿਰੀ ਦੇ ਪਰਿਵਾਰ ਅਤੇ ਦੋਸਤਾਂ ਦਾ ਕਹਿਣਾ ਹੈ ਕਿ ਉਹ ਲਗਭਗ ਪੰਜ ਸਾਲਾਂ ਤੋਂ ਇਨਸਾਫ਼ ਦੀ ਉਡੀਕ ਕਰ ਰਹੇ ਸਨ ਕਿਉਂਕਿ ਅਦਾਲਤਾਂ ਪਿੰਕਨੀ ਦੀ ਮਾਨਸਿਕ ਸਥਿਤੀ (ਮਾਨਸਿਕ ਯੋਗਤਾ) ਦੀ ਜਾਂਚ ਕਰ ਰਹੀਆਂ ਸਨ। ਅੰਤ ਵਿੱਚ ਸ਼ੁੱਕਰਵਾਰ ਨੂੰ, ਉਹ ਅਦਾਲਤ ਵਿੱਚ ਮੌਜੂਦ ਸਨ ਜਦੋਂ ਪਿੰਕਨੀ, ਜੋ ਹੁਣ 30 ਸਾਲਾਂ ਦਾ ਹੈ, ਨੂੰ 25 ਸਾਲ ਤੋਂ ਲੈ ਕੇ ਉਮਰ ਕੈਦ ਤੱਕ ਦੀ ਸਜ਼ਾ ਸੁਣਾਈ ਗਈ। ਇਹਨਾਂ ਗਰਮੀਆਂ ’ਚ ਦੋਸ਼ੀ ਪਿੰਕਨੀ ਨੇ ਇੱਕ ਸਮਝੌਤਾ (plea deal) ਕੀਤਾ ਅਤੇ ਅਪਰਾਧ ਨੂੰ ਕਬੂਲ ਕੀਤਾ; ਉਸਨੇ ਮੰਨਿਆ ਕਿ ਉਸੇ ਰਾਤ ਉਸਨੇ ਇੱਕ ਹੋਰ ਵਿਅਕਤੀ ’ਤੇ ਵੀ ਬੇਵਜ੍ਹਾ ਚਾਕੂ ਨਾਲ ਹਮਲਾ ਕਰਕੇ ਉਸਨੂੰ ਜ਼ਖਮੀ ਕੀਤਾ ਸੀ ਅਤੇ ਇੱਕ ਤੀਜੇ ਵਿਅਕਤੀ ਦਾ ਪਿੱਛਾ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ ਜੋ ਬਚ ਨਿਕਲਿਆ ਸੀ। ਉਸ ਤੀਜੇ ਵਿਅਕਤੀ ਨੇ ਪੁਲਿਸ ਨੂੰ ਸੱਦਿਆ, ਜਿਸ ਤੋਂ ਬਾਅਦ ਪੁਲਿਸ ਨੇ ਪਿੰਕਨੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਗਿਰੀ ਦੇ ਪਿਤਾ ਅਤੇ ਭੈਣ ਨੇ ਜੱਜ ਨੂੰ ਦੱਸਿਆ ਕਿ ਗਿਰੀ ਨੇ ਇਟਲੀ ਵਿੱਚ ਇੱਕ ਸ਼ਾਨਦਾਰ ਨੌਕਰੀ ਛੱਡ ਦਿੱਤੀ ਸੀ ਕਿਉਂਕਿ ਉਸਨੂੰ ਵਿਸ਼ਵਾਸ ਸੀ ਕਿ ਉਹ ਨਿਊਯਾਰਕ ਵਿੱਚ ਆਪਣੇ ਸੁਪਨੇ ਪੂਰੇ ਕਰ ਸਕਦਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਭਵਿੱਖ ਤਬਾਹ ਹੋ ਗਿਆ ਅਤੇ ਦੁਨੀਆ ਨੇ ਇੱਕ ‘ਅਸਧਾਰਨ ਵਿਅਕਤੀ’ ਅਤੇ ‘ਤੇਜ਼ ​​ਬੁੱਧੀ ਵਾਲੇ ਇਨਸਾਨ’ ਨੂੰ ਗੁਆ ਦਿੱਤਾ।
ਬਚਾਅ ਪੱਖ ਨੇ ਦਾਅਵਾ ਕੀਤਾ ਕਿ ਹਮਲਿਆਂ ਵਾਲੀ ਰਾਤ ਪਿੰਕਨੀ ਮਾਨਸਿਕ ਸੰਤੁਲਨ ਵਿਗੜਨ (psychotic episode) ਦੀ ਸਮੱਸਿਆ ਨਾਲ ਜੂਝ ਰਿਹਾ ਸੀ ਅਤੇ ਹੁਣ ਉਹ ਦਵਾਈਆਂ ਲੈ ਰਿਹਾ ਹੈ। ਸਰਕਾਰੀ ਵਕੀਲ ਨੇ ਇਸ ਦਾ ਵਿਰੋਧ ਕਰਦਿਆਂ ਦਲੀਲ ਦਿੱਤੀ ਕਿ ਉਸਦੀਆਂ ਕਾਰਵਾਈਆਂ ਜਾਣਬੁੱਝ ਕੇ ਕੀਤੀਆਂ ਗਈਆਂ ਸਨ ਅਤੇ ਦੱਸਿਆ ਕਿ ਪਿੰਕਨੀ ਆਪਣੇ ਅਪਾਰਟਮੈਂਟ ਤੋਂ ਰਬਿੰਗ ਅਲਕੋਹਲ ਅਤੇ ਹੱਡੀਆਂ ਕੱਟਣ ਵਾਲਾ ਚਾਕੂ (boning knife) ਲੈ ਕੇ ਨਿਕਲਿਆ ਸੀ। ਸ਼ੁੱਕਰਵਾਰ ਨੂੰ ਸਜ਼ਾ ਸੁਣਾਏ ਜਾਣ ਦੌਰਾਨ ਪਿੰਕਨੀ ਦੇ ਵਕੀਲਾਂ ਨੇ ਅਦਾਲਤ ਨੂੰ ਇਹ ਵੀ ਦੱਸਿਆ ਕਿ ਪਿੰਕਨੀ ਦੇ ਪਿਤਾ ਇੱਕ ਪਾਦਰੀ ਹਨ; ਉਨ੍ਹਾਂ ਨੇ ਮੁਆਫ਼ੀ ਮੰਗੀ ਅਤੇ ਕਿਹਾ ਕਿ ਉਨ੍ਹਾਂ ਦਾ ਪੁੱਤਰ ਅਸਲ ਵਿੱਚ ਇੱਕ ਚੰਗਾ ਇਨਸਾਨ ਸੀ। ਪਿੰਕਨੀ, ਜਿਸਦਾ ਅਪਰਾਧਿਕ ਰਿਕਾਰਡ ਕਾਫ਼ੀ ਲੰਬਾ ਹੈ, ਗੈਂਗ ਹਮਲੇ (ਸਮੂਹਿਕ ਹਮਲੇ) ਦੇ ਮਾਮਲੇ ਵਿੱਚ ਚਾਰ ਸਾਲ ਦੀ ਸਜ਼ਾ ਕੱਟਣ ਤੋਂ ਬਾਅਦ ਪੈਰੋਲ ’ਤੇ ਬਾਹਰ ਸੀ, ਜਦੋਂ ਉਸਨੇ ਗਿਰੀ ਦੀ ਹੱਤਿਆ ਕੀਤੀ। ਜੱਜ ਨੇ ਗਿਰੀ ਦੇ ਪਰਿਵਾਰ ਦਾ ਉਨ੍ਹਾਂ ਦੀ ਬਹਾਦਰੀ ਭਰੀ ਗੱਲਬਾਤ ਲਈ ਧੰਨਵਾਦ ਕੀਤਾ। ਜੱਜ ਨੇ ਕਿਹਾ, ‘ਮਾਣਯੋਗ ਜੱਜ ਨੇ ਟਿੱਪਣੀ ਕਰਦਿਆਂ ਕਿਹਾ ਕਿ ਗਿਰੀ ਇੱਕ ਬਹੁਤ ਹੀ ਵਧੀਆ ਨੌਜਵਾਨ ਜਾਪਦਾ ਸੀ। ਉਸਦਾ ਜਾਣਾ ਸੱਚਮੁੱਚ ਇੱਕ ਦੁਖਾਂਤ ਹੈ।’