ਲਾਸ ਏਂਜਲਸ/ਨਿਊਯਾਰਕ, 16 ਸਤੰਬਰ (ਅਰਜਨ ਰਿਆੜ, ਧੀਰਜ ਛੋਕਰਾਂ) –ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਮੰਗਲਵਾਰ ਸ਼ਾਮ ਨੂੰ ਲਾਸ ਏਂਜਲਸ ਵਿੱਚ ਐੱਨ.ਬੀ.ਸੀ. ਸਟੇਸ਼ਨ ਕੇ.ਐੱਨ.ਬੀ.ਸੀ. ਨਾਲ ਸਬੰਧਤ ਇੱਕ ਨਿਊਜ਼ ਹੈਲੀਕਾਪਟਰ ਦੇ ਘਾਤਕ ਬੱਸ ਟੱਕਰ ਵਾਲੀ ਥਾਂ ਨੇੜੇ ਹਾਦਸਾਗ੍ਰਸਤ ਹੋਣ ਕਾਰਨ ਘੱਟੋ-ਘੱਟ ਤਿੰਨ ਲੋਕਾਂ ਦੀ ਮੌਤ ਹੋ ਗਈ। ਚੈਟਸਵਰਥ ਵਿੱਚ ਮੇਸਨ ਐਵੇਨਿਊ ਦੇ 9100-ਬਲਾਕ ਵਿੱਚ ਦੋ ਵਪਾਰਕ ਇਮਾਰਤਾਂ ਵਿਚਕਾਰ ਹੈਲੀਕਾਪਟਰ ਹਾਦਸਾਗ੍ਰਸਤ ਹੋ ਗਿਆ। ਲਾਸ ਏਂਜਲਸ ਫ਼ਾਇਰ ਡਿਪਾਰਟਮੈਂਟ ਨੇ ਕਿਹਾ ਕਿ ਮੌਕੇ ’ਤੇ ਮਰਨ ਵਾਲੇ ਤਿੰਨ ਲੋਕਾਂ ਤੋਂ ਇਲਾਵਾ, ਇੱਕ ਵਿਅਕਤੀ ਨੂੰ ਅਣਪਛਾਤੀ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ। ਐੱਲ.ਏ.ਐੱਫ.ਡੀ. ਦੇ ਬੁਲਾਰੇ ਨੇ ਕਿਹਾ ਕਿ ਮਾਰੇ ਗਏ ਲੋਕਾਂ ਵਿੱਚੋਂ ਇੱਕ ਜ਼ਮੀਨ ’ਤੇ ਪੈਦਲ ਯਾਤਰੀ ਸੀ। ਇਹ ਸਪੱਸ਼ਟ ਨਹੀਂ ਹੈ ਕਿ ਹੋਰ ਪੀੜਤ ਹੈਲੀਕਾਪਟਰ ਵਿੱਚ ਸਵਾਰ ਸਨ ਜਾਂ ਨਹੀਂ। ਅਧਿਕਾਰੀਆਂ ਨੇ ਇਹ ਵੀ ਕਿਹਾ ਕਿ ਇਹ ਤੁਰੰਤ ਪਤਾ ਨਹੀਂ ਲੱਗ ਸਕਿਆ ਕਿ ਹੈਲੀਕਾਪਟਰ ਵਿੱਚ ਕਿੰਨੇ ਲੋਕ ਸਵਾਰ ਸਨ। ਅੱਗ ਬੁਝਾਊ ਅਮਲੇ ਨੇ ਕਿਹਾ ਕਿ ਜਦੋਂ ਉਹ ਪਹੁੰਚੇ ਤਾਂ ਹੈਲੀਕਾਪਟਰ ਪੂਰੀ ਤਰ੍ਹਾਂ ਅੱਗ ਦੀ ਲਪੇਟ ਵਿੱਚ ਆ ਗਿਆ ਸੀ। ਅੱਗ ਬੁਝਾਊ ਵਿਭਾਗ ਨੇ ਕਿਹਾ ਕਿ ਅੱਗ ਨਾਲ ਚਾਰ ਵਾਹਨ ਅਤੇ ਦੋ ਸਟੋਰੇਜ ਕੰਟੇਨਰ ਨੁਕਸਾਨੇ ਗਏ ਹਨ। ਨੈਸ਼ਨਲ ਟ੍ਰਾਂਸਪੋਰਟੇਸ਼ਨ ਸੇਫ਼ਟੀ ਬੋਰਡ ਅਤੇ ਫੈੱਡਰਲ ਏਵੀਏਸ਼ਨ ਐਡਮਿਨਿਸਟ੍ਰੇਸ਼ਨ ਜਾਂਚ ਕਰਨਗੇ। ਇਹ ਹਾਦਸਾ ਇੱਕ ਵੱਡੀ ਬੱਸ ਟੱਕਰ ਵਾਲੀ ਥਾਂ ਤੋਂ ਇੱਕ ਮੀਲ ਤੋਂ ਵੀ ਘੱਟ ਦੂਰੀ ’ਤੇ ਵਾਪਰਿਆ, ਜਿਸ ਵਿੱਚ ਘੱਟੋ-ਘੱਟ ਦੋ ਲੋਕਾਂ ਦੀ ਮੌਤ ਹੋ ਗਈ। ਫ਼ੁਟੇਜ ਵਿੱਚ ਇੱਕ ਐੱਸ.ਯੂ.ਵੀ. ਇੱਕ ਮੈਟਰੋ ਬੱਸ ਵਿੱਚ ਫ਼ਸੀ ਹੋਈ ਦਿਖਾਈ ਦੇ ਰਹੀ ਹੈ ਅਤੇ ਲੋਕਾਂ ਦਾ ਨੇੜੇ ਹੀ ਇਲਾਜ ਕੀਤਾ ਜਾ ਰਿਹਾ ਹੈ।