ਨਿਊਯਾਰਕ, 26 ਜੂਨ (ਅਰਜਨ ਰਿਆੜ, ਧੀਰਜ ਛੋਕਰਾਂ)- ਨਿਊ ਜਰਸੀ ਦੀਆਂ ਦੋ ਔਰਤਾਂ ਜੋ ਕਿ ਵਿਸ਼ਵ ਕੱਪ ਵਾਚ ਪਾਰਟੀ ਤੋਂ ਘਰ ਜਾ ਰਹੀਆਂ ਇੱਕ ਹਿੱਟ-ਐਂਡ-ਰਨ ਹਾਦਸੇ ਦਾ ਸ਼ਿਕਾਰ ਹੋ ਗਈਆਂ| ਇਸ ਭਿਆਨਕ ਹਾਦਸੇ ਦਾ ਵੀਡੀਓ ਵੀ ਸਾਹਮਣੇ ਆਇਆ ਹੈ| ਏਸੇਕਸ ਕਾਉਂਟੀ ਪ੍ਰੌਸੀਕਿਊਟਰ ਦੇ ਦਫ਼ਤਰ ਨੇ ਕਿਹਾ ਕਿ ਮਾਰੀਆਨਾ ਐਲਿਜ਼ਾਬੈੱਥ ਵਾਲਵਰਡੇ ਬੇਲਟਰਾਨ (58) ਅਤੇ ਮਾਰੀਆ ਇਜ਼ਾਬੇਲ ਡੇਲੋਸ ਐਂਜਲਸ ਸਲਗਾਡੋ ਅਯਾਲਾ (61) ਪਾਰਕ ਐਵੇਨਿਊ ਅਤੇ ਨੇਵਾਰਕ ਵਿੱਚ ਨੌਰਥ 7ਵੀਂ ਸਟਰੀਟ ’ਤੇ ਚੌਰਾਹੇ ’ਤੇ ਪੈਦਲ ਜਾ ਰਹੀਆਂ ਸਨ ਜਦੋਂ ਇੱਕ ਸਿਰਫਿਰੇ ਡਰਾਈਵਰ ਨੇ ਉਨ੍ਹਾਂ ਦੋਵਾਂ ਨੂੰ ਟੱਕਰ ਮਾਰ ਦਿੱਤੀ। ਪ੍ਰਾਪਤ ਵੀਡੀਓ ਦੇ ਅਨੁਸਾਰ, ਸਟ੍ਰੀਟ ਨਿਗਰਾਨੀ ਕੈਮਰਿਆਂ ਨੇ ਸ਼ੱਕੀ, ਜਿਸਦੀ ਪਛਾਣ 26 ਸਾਲਾ ਡੇਵਿਡ ਜੇ. ਜ਼ਪਾਟਾ-ਵੇਰਾ ਵਜੋਂ ਹੋਈ ਹੈ, ਨੂੰ ਚੌਰਾਹੇ ਵਿੱਚੋਂ ਦੌੜਦੇ ਹੋਏ, ਦੋਵਾਂ ਔਰਤਾਂ ਨੂੰ ਟੱਕਰ ਮਾਰਦੇ ਹੋਏ ਅਤੇ ਉਨ੍ਹਾਂ ਨੂੰ ਹਵਾ ਵਿੱਚ ਉਛਾਲਦੇ ਹੋਏ ਕੈਦ ਕਰ ਲਿਆ। ਔਰਤਾਂ ਦੇ ਰਿਸ਼ਤੇਦਾਰ ਉਨ੍ਹਾਂ ਦੀਆਂ ਮੌਤਾਂ ਤੋਂ ਸਦਮੇ ਵਿੱਚ ਸਨ। ਬੇਲਟ੍ਰਾਨ ਦੇ ਰਿਸ਼ਤੇਦਾਰੀ ’ਚੋਂ ਭਰਾ ਨੇ ਕਿਹਾ ਕਿ ਮੈਨੂੰ ਉਮੀਦ ਹੈ ਕਿ ਦੋਸ਼ੀ ਵਿਅਕਤੀ ਮਿਲ ਜਾਵੇਗਾ ਪਰ ਉਸ ਨੂੰ ਸਜ਼ਾ ਵੀ ਹੋ ਜਾਵੇਗੀ, ਪਰ ਸਾਨੂੰ ਆਪਣੇ ਜੀਅ ਤੋਂ ਬਿਨਾਂ ਜਿਊਣਾ ਪਵੇਗਾ|  
ਦੂਜੇ ਪਾਸੇ ਖਬਰ ਹੈ ਕਿ ਨੇਵਾਰਕ ਦੇ ਜ਼ਪਾਟਾ-ਵੇਰਾ ਨੇ ਘਾਤਕ ਹਾਦਸੇ ਤੋਂ ਤਿੰਨ ਦਿਨ ਬਾਅਦ ਮੰਗਲਵਾਰ ਨੂੰ ਪੁਲਿਸ ਅੱਗੇ ਆਤਮ ਸਮਰਪਣ ਕਰ ਦਿੱਤਾ। ਉਸ ’ਤੇ ਦੂਜੇ ਦਰਜੇ ਦੇ ਵਾਹਨ ਨਾਲ ਕਤਲ ਦੇ ਦੋ ਦੋਸ਼, ਇੱਕ ਮੋਟਰ ਵਾਹਨ ਹਾਦਸੇ ਦੇ ਸਥਾਨ ਨੂੰ ਛੱਡਣ ਦੇ ਦੂਜੇ ਦਰਜੇ ਦੇ ਦੋ ਦੋਸ਼, ਜਿਸਦੇ ਨਤੀਜੇ ਵਜੋਂ ਮੌਤਾਂ ਹੋਈਆਂ ਅਤੇ ਇੱਕ ਜ਼ਖਮੀ ਪੀੜਤ ਨੂੰ ਖਤਰੇ ਵਿੱਚ ਪਾਉਣ ਵਾਲੇ ਤੀਜੇ ਦਰਜੇ ਦੇ ਦੋ ਦੋਸ਼ ਲਗਾਏ ਗਏ ਹਨ। ਜੇਲ੍ਹ ਰਿਕਾਰਡਾਂ ਅਨੁਸਾਰ, ਜ਼ਪਾਟਾ-ਵੇਰਾ ਨੂੰ ਬਿਨਾਂ ਜ਼ਮਾਨਤ ਦੇ ਐਸੈਕਸ ਕਾਉਂਟੀ ਜੇਲ੍ਹ ਵਿੱਚ ਰੱਖਿਆ ਜਾ ਰਿਹਾ ਹੈ।